Rusiyanın tanınmış hərbi analitiki İqor Korotçenko İranla bağlı fikirləri müzakirələrə səbəb olub.

Belə ki, o, artıq rəsmi Tehranın uduzduğunu bildirib:

“İran birmənalı olaraq uduzub. İranda əsas problem hakimiyyətin transferi məsələsidir. İranın Ali Rəhbəri elə yaşdadır ki, artıq hakimiyyəti kiməsə ötürməlidir. Bundan başqa biz İranın hazırkı prezidentinin simasında yeni Qorbaçovu görürük. O da İranda yenidənqurmaya getsə, mövcud rejimin sonunu gətirəcək. Əlbəttə ki, hər şey İranın Ali Rəhbərliyinin fəaliyyətindən asılı olacaq. Əgər İran Ali Rəhbərliyi hakimiyyət transferini uğurlu, yəni ayətullahların və hərbçilərin nəzarəti altında sakit həyata keçirməsə, bu İslam Respublikası üçün pis nəticələnəcək”.

Globalinfo.az-a danışan politoloq İlyas Hüseynov deyib ki, İranla bağlı müxtəlif versiyalar var. Adətən Qərb analitikləri Tehranla bağlı fikirlər səsləndirərkən İranın beynəlxalq səviyyədə mövqe itirdiyini qeyd edirlər:

“İranda sosial-iqtisadi problemlər var. Ölkəyə tətbiq olunan sanksiyalar mənfi təsirlər göstərir. Yaxın zamanda başlayacaq xalq etirazlarının hakimiyyətin sonunu gətirəcəyini bildirən fikirlər səsləndirilir. Amma bu hakimiyyət 1979-cu ildən bəri hələ də hakimiyyətdədir. Ali rəhbər ölkədə bütün hakimiyyət qollarına nəzarət edir, əsas siyasi qərarların sahibidir. Çox çətin bir regionda, beynəlxalq basqılar altında olmasına baxmayaraq İran həm resurs tapır, həm maddi ehtiyaclarını ödəyir, həm də öz geopolitik ambisiyalarını Yaxın Şərq regionunda yürüdür”.

Politoloqun sözlərinə görə, Suriyada Bəşər Əsədin devrilməsi İrana böyük zərbə vurdu:

“İsrail-HƏMAS arasındakı döyüşlərdə də hərbi infrastruktur darmadağın vəziyyətdədir. Əsasən də relyefi, döyüş şəraitini, döyüşçülərin psixoloji durumunu nəzərə alsaq bütün məsələlərin bölmə rəhbərlərinin, sahə komandirlərinin üzərində olduğunu görərik. Onları da İsrail ordusu bir-bir öldürür. Bu da çox ciddi psixoloji təsir metodudur.

İranda islahatlara böyük ehtiyac var. Lakin bu da mənfi nəticələr yarada bilər. Çünki İran monolit dövlət deyil, burada dini təsirlə yanaşı həm də ordunun dövlətə və siyasətə böyük təsiri var”.