Rusiyanın Ukraynaya qarşı müharibəsi 2025-ci ildə başa çatması mümkündür. Bunun üçün sanksiyaların gücləndirilməsi və Ukraynaya təhlükəsizlik təminatının verilməsi tələb olunur.

Globalinfo.az xəbər verir ki, bunu Ukrayna Prezidenti Vladimir Zelenski Böyük Britaniyanın ITV News telekanalına müsahibəsində deyib.

Onun sözlərinə görə, Kiyev “yalnız təcavüzün yeni dalğasını təxirə salacaq” münaqişənin dondurulmasını qəbul etməyəcək.

“Əgər Rusiyaya işğal olunmuş əraziləri nəzarətdə saxlamağa icazə verilərsə, Vladimir Putin bunu cəzasızlıq siqnalı kimi qəbul edəcək və bir neçə ildən sonra yenidən müharibəyə başlayacaq. Bizə yeni təcavüzü qeyri-mümkün edəcək real təhlükəsizlik zəmanətləri lazımdır”, – Zelenski vurğulayıb.

O vurğulayıb ki, Rusiyaya təzyiqi artırmaq üçün sanksiyalar total olmalıdır:

“Xalqı arxayın etmək üçün Ukraynanın təhlükəsizliyinə təminat verilməsi vacibdir. Bu gün biz artıq Ukrayna üçün ədalətdən danışmırıq, müharibənin qaynar mərhələsinə son qoymaqdan danışırıq. Ədalətli, həqiqi sülh bizim üçün vacibdir, amma gəlin müəyyən addımlar alaq. Təhlükəsizlik zəmanəti – o zaman müharibənin qaynar mərhələsini dayandırmaqdan danışmaq olar”.

O, həmçinin qeyd edib ki, ədalətli sülh planı beynəlxalq hüquqa əsaslanmalı və Ukraynanın maraqları nəzərə almalıdır, yalnız üçüncü ölkələr üçün faydalı olmamalıdır.

V.Zelenski 2025-ci ildə müharibəni başa çatdırmaq üçün bütün imkanların yarandığını və ABŞ Prezidenti Donald Trampın da bunu istədiyini əlavə edib.

Xatırladaq ki, Rusiya-Ukrayna müharibəsi 2022-ci il fevralın 24-də başlayıb.