İrandakı səfirliyimizə hücum edən terrorçu Yasin Hüseynzadə barəsində çıxarılan edam hökmü qərarının təsdiqlənməsi ictimaiyyətdə müsbət dəyərləndirildi.

Tehranın 2023-cü ildə İranda saxlanılan və həbs olunan azərbaycanlı tələbə Fərid səfərlinin azadlığa buraxılmasından dərhal sonra bu addımı atması diqqət çəkib.

Həmçinin Azərbaycan və İranın Birgə İqtisadi Komissiyasının iclasında “Şimal-Cənub” dəhlizinin tamamlanmasının sürətləndirməsi ilə bağlı da razılıq əldə olunub.

Beləliklə, iki ölkə arasında münasibətlərin düzəldiyini demək mümkündürmü? Tehranın “jest” olaraq təqdim edilən son addımlarına Bakının yanaşması necə olacaq?

Globalinfo.az-a danışan politoloq Fərid Şəfiyev deyib ki, iki ölkə arasında münasibətlərin yaxşılaşdırılmasına dair məsələlər müzakirə olunur:

“Lakin burada Bakının hansısa jest etməsi doğru yanaşma deyil. Məqsəd münasibətlərin normallaşdırılmasıdırsa, bu istiqamətdə hər iki tərəf addım atır. Ümumiyyətlə, Azərbaycanın İrana qarşı heç bir ədavəti, düşmənçiliyi yoxdur. Tehran hökuməti əleyhinə hansısa tədbir görülməyib.

Yasin Hüseynzadə ilə bağlı verilən qərar gecikmiş olsa da, doğrudur. Fərid Səfərli isə ümumiyyətlə, günahsız idi. Onun həbsi olunması düzgün deyildi. Görünür, İran Prezidenti Məsud Pezeşkian hökuməti Azərbaycanla münasibətləri normallaşdırmağa çalışır. Amma prosesin davamlılığı sual altındadır”.

“İran əvvəllər də bənzər formada münasibətləri normallaşdırmaq istəməsinə baxmayaraq, təxribatlardan geri durmayıb. O baxımdan prosesin gələcəyi Tehrandan daha çox asılıdır”, – politoloq bildirib.