“Azərbaycanın İrandakı səfirliyinin fəaliyyətini yenidən bərpa etməsi iki ölkə arasında münasibətlərin normallaşması istiqamətində atılan addım kimi qiymətləndirilməlidir”.

Bu sözləri Globalinfo.az-a politoloq Əlimusa İbrahimov Azərbaycanın İrandakı səfirliyinin fəaliyyətini yenidən bərpa etməsini şərh edərkən deyib.

Onun sözlərinə görə, İranda keçirilən seçkilərdə azərbaycanlı Məsud Pezeşkianın qalib gəlməsindən sonra atılan bu addım həqiqətən, münasibətlərin daha müsbət istiqamətdə inkişaf edəcəyindən xəbər verir:

“Düşünürəm ki, səfirlik iki ölkə arasında münasibətlərin yeni xətt üzərində inkişaf etdirilməsi üçün fəaliyyətini bərpa etdi. Məncə, son hadisələr baş verməsəydi, bizim səfirlik də fəaliyyətini bu tezliklə bərpa etməyəcəkdi və biz bunu gözləmirdik.

Azərbaycan tərəfinin bu addımı Tehranda ciddi qarşılanacaq və onlar da bu istiqamətdə zəruri tədbir görəcəklər. Hesab edirəm ki, yeni fəaliyyətə başlayan səfirliyimizin ilk işi ölkə başçıları arasında ikitərəfli görüşün təşkil edilməsidir. Ən ideal gediş isə Pezeşkianın ilk xarici səfərinin Azərbaycana olmasıdır. Heç şübhəsiz, diplomatlarımız bu istiqamətdə zəruri addımlarını atacaqlar”.