Son aylar İran-İsrail münasibətlərinin gərginləşməsi Yaxın Şərqin yeni müharibə ocağına çevriləcəyi ilə bağlı narahatlıqlar yaratmağa başlayır. Tərəflər qarşılıqlı şəkildə bir-birilərinin ərazilərinə hücumlar həyata keçirir, strateji obyektləri vuracaqlarına dair xəbərdarlıqlar edirlər. Oktyabrın 26-na keçən gecə İsrail İrana növbəti dəfə zərbə endirib. Ölkə rəsmilərinin verdiyi məlumata görə, zərbə nəticəsində İran ərazisindəki nüvə obyektlərinə ziyan dəyməyib.

Bu açıqlamaya rəğmən, ümumi narahatlıq var. İnsanlar təşviş keçirir ki, İsrailin son hücumları zamanı İranın nüvə obyektləri zədələnər. Bu, qonşu ölkələrə, eləcə də Azərbaycana problem yarada bilərmi? Bu nüvə obyektləri nədir? Ora zədələnibsə, sızma, şüalanma mümkündürmü?

Globalinfo.az-a danışan politoloq Rizvan Hüseynov deyib ki, İsrail İranın bəzi obyektlərinə zərbə endirib:

“Bu elə də güclü zərbələr deyil. Nüvə obyektlərinə zərbə endirildiyi ilə bağlı heç bir məlumat yoxdur. Bu hal baş verərsə, əlbəttə qonşu ölkələrə də mənfi təsirini göstərəcək.

Son zərbələrə gəldikdə isə İsrail tərəfindən əvvəlcədən İrana bu hücumlarla bağlı xəbərdarlıq edilmişdi. Ona görə də bütün dünya belə bir prosesin baş tutacağını bilirdi. Hətta İran, ümumiyyətlə, Yaxın Şərq regionu üzərindən hərəkət edən bütün təyyarələrin hərəkət trayektoriyası dəyişmişdi. Onlar Aralıq dənizi, Misir və s. üzərindən uçurdu. Burada iki tərəf faktiki olaraq savaş öncəsi bir-birilərinə zərbələr endirirlər. İran və İsrail arasında böyük müharibənin olmamasına ümid edirik”.

Politoloqun sözlərinə görə, Azərbaycan qonşuluğunda yerləşən İranda böyük müharibənin olmasını istəmir:

“İrana zərbə endirilərsə, rəsmi Tehran İsrailə ağır cavab verəcək. Bu da bütün Yaxın Şərqi qarışdıracaq. Regionda böyük humanitar fəlakət baş verə bilər”.