Avropa Komissiyası Macarıstanın hazırkı rəhbərliyinin dəyişdirilməsi ssenarilərini nəzərdən keçirir.

Publika.az xəbər verir ki, bu barədə Rusiya Xarici Kəşfiyyat Xidməti bildirib. Məlumata görə, Brüssel Budapeştin Aİ-də, o cümlədən Rusiya və Ukrayna ilə bağlı məsələlərlə bağlı kollektiv qərarların qəbuluna təsir etmək cəhdlərindən narazıdır.

Gərginliyin son səbəbi Macarıstanın Avropa İttifaqının yeni yeddiillik büdcə layihəsinə mane olması olub. Açıqlamalara görə, Avropa Komissiyasının sədri Ursula fon der Leyen müxalifətdə olan Piter Maqyarın hakimiyyətə gəlməsi imkanını ciddi şəkildə nəzərdən keçirir. Onu dəstəkləmək üçün artıq əhəmiyyətli maddi, inzibati və media resursları, o cümlədən Almaniyanın partiya fondları, Norveçin insan haqları üzrə QHT-ləri və Avropa Xalq Partiyasının vəsaitləri ayrılıb.

Rusiya Xarici Kəşfiyyatı iddia edir ki, Kiyev Ukrayna xüsusi xidmət orqanlarının və Macarıstandakı diasporun imkanlarından istifadə edərək Viktor Orban hökumətini zəiflətmək kampaniyasında fəal iştirak edir. Buna səbəb Budapeştin Ukraynanın Avropaya inteqrasiyasına mane olan mövqeyi olub. Orban daha əvvəl bəyan etmişdi ki, Ukraynanın Aİ-yə daxil olması Macarıstan iqtisadiyyatına ziyan vuracaq, cinayətin artmasına səbəb olacaq və Avropada müharibə riskini artıracaq.