İsveçin Karolinska İnstitutunun alimləri antibiotiklərə qarşı müqavimət göstərən təhlükəli bakteriyaların öhdəsindən gəlmək üçün ümidverici bir üsul kəşf ediblər. Araşdırmalar nəticəsində məlum olub ki, endolizin adlı ferment antibiotiklərin təsirini yenidən gücləndirə bilir.

Milli.Az xəbər verir ki, "Nature" jurnalında dərc olunan tədqiqatda, siçanlara beyin qişalarının iltihabına (menenjitə) səbəb olan davamlı pnevmokok bakteriyaları yeridilib.

Daha sonra onlara penisilin antibiotiki ilə birlikdə endolizin fermenti verilib. Bu birləşmə, bakteriyaların hüceyrə divarını dağıdaraq antibiotikin təsirini bərpa edib. Təcrübədəki bütün siçanlar sağalıb və heç bir xəstəlik əlaməti müşahidə olunmayıb.

Tədqiqatın rəhbəri, Karolinska İnstitutunun tibbi mikrobiologiya üzrə dosenti Federiko İovino bildirib ki, endolizin çox qısa müddətdə cəmi bir neçə saat ərzində beyin toxumasına nüfuz edir:

"Fermentin bu qədər sürətli təsiri menenjit kimi ağır infeksiyaların müalicəsində yeni imkanlar yaradır", - deyə alim bildirib.

Lakin İovino onu da vurğulayıb ki, müalicə gecikmədən infeksiyadan maksimum iki gün sonra başlanmalıdır. Əks halda, nevroloji fəsadlar və ölüm riski əhəmiyyətli dərəcədə artır.

Alimlər, antibiotiklərə davamlı bakteriyaları "səssiz pandemiya" adlandırırlar. Bu bakteriyalar klassik müalicə üsullarına cavab vermir və pnevmoniya, menenjit kimi xəstəliklərin müalicəsini getdikcə çətinləşdirir. Federiko İovinonun fikrincə, əgər vəziyyət dəyişməzsə, 20-30 il ərzində bu bakteriyalar xərçəngdən daha çox insan ölümünə səbəb ola bilər.