Moldovanın hazırkı Prezidenti Maya Sandu ölkədə baş tutmuş prezident seçkilərinin ikinci turunda rəqibi Aleksandr Stoyanoqlonu geridə qoyaraq seçicilərin 55 faizinin səsini qazanıb.

Globalinfo.az “Report”a istinadən bildirir ki, bu barədə ölkənin Mərkəzi Seçki Komissiyasının protokolların 98,7 faizinin hesablanmasından sonra elan etdiyi ilkin nəticələrdən bəlli olub. İlkin nəticələrə görə, rusiyayönümlü müxalifətin namizədi Stoyanoqloya seçicilərin 45 faizi güvənib.

Seçkilərdə diqqətçəkən məqamlardan biri avropayönümlü mövqeyi ilə bilinən Sandunun ölkə xaricində (82,3 faiz), rusiyameyilli və avroskeptik baxışları ilə seçilən Stoyanoqlonun isə əsasən etnik azlıqların yaşadığı Qaqauz Yeri Muxtar Bölgəsi (97 %) və hökumətin birbaşa nəzarətində olmayan Dnestr çayının sol sahilindəki inzibati-ərazi vahidlərində (79,4 %) böyük fərqlə qələbə qazanması olub.

Eyni zamanda, Maya Sandu paytaxt Kişineuda da inamlı qələbə qazanıb – 57,38 %.

Ümumilikdə, ölkə daxilində protokolların 100 faizinin emalından sonra Stoyanoqlo səslərin 51,2 faizini, Sandu isə 48,8 faizini alıb. Ölkə xaricində isə protokolların 87,5 faizinin emalından sonra durum tərsinə – 82,3 faiz səslə hazırkı prezidentin dövlət başçısının xeyrinə olub.

Xatırladaq ki, iki həftə öncə keçirilmiş birinci turda Maya Sandu seçicilərin 42,5 faizinin səsini toplamışdı. Onun rəqibi Aleksandr Stoyanoqlo təxminən 26 % səs almışdı.

Eyni gündə, oktyabrın 20-də, Moldovanın Avropaya inteqrasiyası haqqında referendum baş tutmuşdu. Ölkənin Avropa inteqrasiyası lehinə səslərin sayı əleyhinə olan səslərin sayı ilə, demək olar ki, bərabər olmuşdu. Aİ-yə üzvlüyü seçicilərin 50,39 %-i dəstəkləmiş, 49,61 %-i əleyhinə olmuşdu.

Oktyabrın 21-də Aİ-nin xarici siyasət xidmətinin nümayəndəsi Peter Stano Brüsseldə keçirilmiş brifinqdə Rusiya və onun nümayəndələrinin Moldova səsvermələrinə misli görünməmiş müdaxiləsi barədə bəyanat vermişdi. Oktyabrın 22-də Moldova hüquq-mühafizə orqanlarının seçkilərin birinci turu və referendum zamanı 400-dən çox seçici satınalınması halını araşdırdığı məlum olmuşdu.

Oktyabrın 31-də Moldovada Mərkəzi Seçki Komissiyasının (MSK) binasını, həmçinin Baş Polis Müfəttişliyinin dayanacağında bir neçə avtomobili yandırmağa cəhd edən 5 nəfər saxlanılmışdı.

Eyni zamanda, noyabrın 2-də “Euronews” Moskvanın erməniəsilli Ruben Vardanyan və moldovalı İlan Şor kimi “oliqarx agentlərinin” vasitəsilə regionda təsir gücünü artırmaq niyyətində olduğunu bildirmişdi.

***01:57

Mərkəzi Seçki Komissiyasının protokolların 95 faizinin emalından sonra Sanduya seçicilərin 51,68 faizi, Stoyanoğlu isə seçicilərin 48,32 faizi səs verib.

***

Prezident seçkilərində protokolların 92,38%-i işləndikdən sonra Sandu önə keçib.

Keçmiş baş prokuror Sandu 50.16 faiz, Stoyanoğlu 49,84 faiz səslə öndədir.

***01:00

Prezident seçkilərində protokolların 90%-i işləndikdən sonra namizədlər arasında fərq minimala düşüb.

Keçmiş baş prokuror Stoyanoğlu 50.81 faiz, Sandu 49,19 faiz səslə öndədir.

***00:34

Moldovada keçirilən prezident seçkilərində keçmiş baş prokuror Stoyanoğlu 51,36 faiz, Sandu 48,54 faiz səslə öndədir.

Qeyd edilib ki, bu protokolların 85%-nin açılmasından sonrakı nəticədir.

***00:17

Moldovada keçirilən seçkilərdə ölkənin keçmiş baş prokuroru Aleksandr Stoyanoğlu 52,02% səslə liderlik edir.

Globalinfo.az TASS-a istinadən xəbər verir ki, bu barədə ölkənin mərkəzi seçki komissiyası məlumat yayıb.

Məlumata əsasən, protokolların 76%-i işlənib.

Moldovada keçirilən prezident seçkilərində Stoyanoğlu 52,02%, respublikanın hazırkı Prezidenti Maya Sandu 47,98% səslə liderdir.

*** 23:40

Moldovada prezident seçkilərinin ikinci turunda səsvermə başa çatıb.

Globalinfo.az TASS-a istinadən xəbər verir ki, yerli vaxtla saat 21:00-a olan məlumata görə, seçici fəallığı 54% (təxminən 1,6 milyon seçici) olub.

Qeyd edək ki, seçkilərin ikinci turunda respublikanın hazırkı Prezidenti Maya Sandu və ölkənin keçmiş baş prokuroru Aleksandr Stoyanoğlu mübarizə aparıb.