Şübhəsiz ki, Ermənistanın baş naziri Nikol Paşinyan Fransa, ABŞ və bəzi başqa qərb ölkələrinə arxalanır. Həmin arxayınlıqdan irəli gələrək, İtaliya mətbuatına verdiyi müsahibədə Rusiya ilə bağlı dünya mediasının manşetinə çıxan fikirlər ifadə edib. Bildiyiniz kimi, o ölkələr də məhz Paşinyanın əli ilə Cənubi Qafqazdan Rusiyanı sıxışdırıb çıxarmağa çalışırlar. Danılmazdır ki, bu regionda Rusiyanın əsas dayağı və strateji müttəfiqi Ermənistan idi. Bu gün isə rəsmi İrəvan, Nikol Paşinyan və onun ətrafı əlindən gələni edir ki, Rusiya ilə Ermənistanın münasibəti pozulsun. Amma görünür, Rusiya bu cür bəyanatlara hazır deyilmiş. İstər Zaxarovanın, istər Lavrovun, o cümlədən Peskovun cavablarından hiss olunur ki, həqiqətən də, Rusiya Ermənistanın bu cür addımlarını anlamaqda çətinlik çəkir.

Bu sözləri Publika.az-a açıqlamasında tarixçi alim, Qafqaz Tarixi Mərkəzinin direktoru Rizvan Hüseynov deyib.

R.Hüseynov hesab edir ki, Rusiyanın sözügedən məsələ ilə bağlı xüsusi planı yoxdur:

"Rusiyanın əsas məqsədi regionda öz mövcudluğunu qoruyub saxlamaqdır və ümidlidir ki, Ermənistanın cəzasını Azərbaycanın əli ilə verəcək. Buna görə də, Ermənistana zərbə vurmaq məqsədilə bəzi məsələlərdə Azərbaycanın haqlı mövqeyini dəstəkləyəcək. Biz isə görürük ki, rəsmi Bakı da vəziyyəti anlayır və qəti qərar qəbul etməyə, problemləri hərbi yolla çözməyə tələsmir. Unutmayaq ki, irəlidə BMT Təhlükəsizlik Şurasının daha bir iclası var. O iclasda Azərbaycana təzyiq göstərilə, ölkəmizə qarşı qətnamələr, hətta sanksiyalar qəbul edilə bilər. Odur ki, Ermənistanın eskalasiyasına uymamalı və Azərbaycana qarşı hansısa təzyiq mexanizminin hazırlanmasına imkan verməməliyik".

Tarixçi alim vurğulayıb ki, Rusiya-Ermənistan münasibətlərinin hansı xətlə davam edəcəyilə bağlı iki variant təxmin edilir. O qeyd edib ki, Ermənistan Rusiya ilə əlaqələri tamamilə başqa formata keçirmək istəyir. KTMT-dən çıxmağa çalışır, NATO ilə əməkdaşlığa başlayır və s. Bu təlatüm Qərb ölkələrinə lazımdır. Nəticə isə belə olacaq: Ya Qərb Ermənistan vasitəsilə istədiyinə nail olacaq, ruslar bölgəni tərk edəcək, ya da Rusiya başqa regionlarda, məsələn, Afrikada, Yaxın Şərqdə, Ukrayna cəbhəsində müəyyən siyasi sövdələşmələrə gedərək Ermənistanı qurban verəcək.

"Hansı variantın baş tutacağından asılı olmayaraq, onların hər ikisi Azərbaycana sərf edir", - R.Hüseynov fikirlərini yekunlaşdırıb.

Mehti Kamiloğlu