“Bir neçə gün öncə ABŞ Dövlət katibi Entoni Blinkenlə Ermənistanın Baş naziri Nikol Paşinyan arasında telefon danışığı baş tutdu. Daha sonra onun Bakıya da zəng edəcəyi gözlənilirdi”.

Bunu Globalinfo.az-a politoloq Oqtay Qasımov sentyabrın 16-da ABŞ Dövlət katibinin Azərbaycan Prezidenti İlham Əliyevə telefon zəngini şərh edərkən deyib.

Onun sözlərinə görə, zəng zamanı əsas müzakirə mövzusu Azərbaycanla Ermənistan arasında danışıqlar prosesi olub:

“Azərbaycanın ABŞ və Qərbin Cənubi Qafqaz siyasəti ilə bağlı qayğıları var. Bu məsələnin telefon danışığı zamanı Blinkenin diqqətinə çatırıldığını demək olar. Ümumiyyətlə, Vaşinqton qısa zamanda Bakı ilə İrəvan arasında sülhün əldə edilməsində maraqlıdır. ABŞ və kollektiv Qərb yarımçıq sülh müqaviləsinin imzalanmasını istəyir. Məhz buna görə prosesi tələsdirməyə çalışırlar.

Nikol Paşinyanın da bildirdiyi kimi tərəflər 16 maddəlik ilkin sülh müqaviləsinin 13 maddəsini artıq razılaşdırıb. Əslində məsələnin düyün nöqtəsi də yerdə qalan üç maddədir. Rəsmi İrəvan konstitusiyanı da dəyişmək istəmir. Hansı ki, bəzi maddələrdə Azərbaycana qarşı ərazi iddiaları var, onların aradan qalxması vacibdir. Bakının bu mövqeyi dəyişilməzdir”.

Politoloq bildirib ki, Bakı yarımçıq sülh müqaviləsinin imzalanmasını istəmir:

“Çünki bu, həm də gələcəkdə yeni ərazi iddiaları və işğal cəhdinə səbəb ola bilər. Azərbaycan həmçinin ATƏT-in Minsk Qrupunun buraxılmasını da istəyir. İrəvanın gələcəkdə öz maraqları naminə bu formatdan istifadə etmək ehtimalı var. Dünənki telefon danışığı tərəflərin mövqeyini çatdırması baxımdan vacib idi. Ümumi mənada bu əlaqəni müsbət adlandırmaq olar”.

Qeyd edək ki, Ermənistanın Baş naziri Nikol Paşinyan sülh müqaviləsini razılaşdırılmış maddələr əsasında imzalamağa hazır olduğunu bildirib, digər məsələlərin sonraya saxlanılmasını təklif edib.