Rusiyanın “Rosatom” şirkəti Özbəkistanla imzaladığı müqavilə əsasında bu ölkədə aşağı güclü atom elektrik stansiyası (AES) inşa edəcək. Bu müqavilə Rusiya Prezidenti Vladimir Putinin Özbəkistana son səfəri zamanı imzalanıb.

Ekspertlər iddia edir ki, bənzər təşəbbüs ölkəmiz üçün də keçərli ola bilər.

Azərbaycanın atom elektrik stansiyasına ehtiyacı varmı?

Globalinfo.az-a danışan iqtisadçı ekspert Vüqar Bayramov deyib ki, Azərbaycan bərpaolunan enerji mənbələrinin hasilində daha çox maraqlıdır:

“Son 8 ayda günəş enerjisi istehsalının 9 dəfə artması da ondan xəbər verir ki, yaşıl enerji istehsalında kəskin artım var. Bu, bir tərəfdən Azərbaycan üçün daxili istehsalatda alternativ mənbələrin artırılmasını, digər tərəfdən ixrac imkanı deməkdir.

AES inşası ilə bağlı rəsmi müzakirələr hələ aparılmayıb. Hesab edirəm, qiymətləndirmədən sonra nəsə demək olar. Bütövlükdə enerji siyasətimizdə bərpaolunan enerjidən istifadə daha prioritetdir. Biz bu enerjini Avropa bazarına çıxarmaq barədə düşünürük”.