Gürcüstan hakimiyyəti ölkədə iki inqilab təşkil etmək cəhdinə görə xarici agentlər haqqında qanun qəbul edib.

Publika.az "Sputnik Gürcüstan"a istinadən xəbər verir ki, bunu Gürcüstanın baş naziri İrakli Kobaxidze bildirib.

“İki inqilab cəhdi fonunda biz “xarici agentlər haqqında” qanun qəbul etdik, onun yeganə məqsədi xaricdən idarə olunan inqilabi hadisələrin şəffaflığı idi”, - deyə o qeyd edib.

Bundan əvvəl Kobaxidze vurğulamışdı ki, Gürcüstanda seçki dövrü xarici qüvvələrin görünməmiş müdaxiləsi fonunda keçir.

Həmçinin, onun sözlərinə görə, Gürcüstanda 450-dən çox təşkilat əvvəllər qəbul edilmiş qanuna uyğun olaraq xarici agentlərin reyestrində qeydiyyatdan keçib.

Xatırladaq ki, mayın 14-də Gürcüstan parlamenti xarici agentlər haqqında qanun qəbul edib. Sənəd xarici mənbələrdən pul alan qeyri-hökumət təşkilatlarının (QHT) və KİV-lərin reyestrinin yaradılmasını nəzərdə tutur. Qanun fiziki şəxslərə şamil edilmir. Qanun layihəsinin müzakirəsi etiraz aksiyaları ilə müşayiət olunub.

Qeyd edək ki, bundan əvvəl Gürcüstan Qərbi “ölkənin düşməni” adlandırmışdı.