Gürcüstan parlamenti prezidentin “xarici agentlər haqqında” qanuna vetosunu ləğv edəcək.

Publika.az xəbər verir ki, bunu Gürcüstan parlamentinin spikeri Şalva Papuaşvili deyib.

“Xanım Salome (Gürcüstan prezidenti Salome Zurabişvilini nəzərdə tutur - red.) özünü bu ölkənin vətəndaşı hesab etmədiyini bütün vasitələrlə nümayiş etdirdi, o, Konstitusiyanı pozduqdan sonra xalqı ələ salmağa başladı” - Papuaşvili deyib.

Onun sözlərinə görə, hakim partiyadan olan deputatlar vetonu ləğv etmək üçün kifayət qədər səsə malikdirlər.

Nəzərinizə çatdıraq ki, vetodan sonra qanun imzalanmaq üçün yenidən prezidentə göndərilməlidir. Gürcüstan prezidenti Salome Zurabişvili yenidən imzalamaqdan imtina edərsə, qanun parlamentin spikeri Şalva Papuaşvili tərəfindən imzalanacaq və bundan sonra qüvvəyə minəcək.

Aprelin 15-dən Tbilisidə 2023-cü ildə olduğu kimi “xarici agentlər haqqında” qanunun geri götürülməsi tələbi ilə mitinqlər keçirilir. Lakin mayın 14-də parlament qanunu üçüncü və yekun oxunuşda qəbul edib.

Gürcüstan hakimiyyəti hesab edir ki, şəffaflıq haqqında qanunun qəbulu Avropa İttifaqının əsas tövsiyəsi olan depolarizasiyaya nail olmaq üçün kritik ilkin şərtdir.

ABŞ, İsrail və Avstraliyada artıq xaricdən maliyyələşmənin şəffaflığı ilə bağlı qanunlar var və belə qanun layihələri Aİ və Fransada nəzərdən keçirilir. Bu arada Avropa İttifaqı və ayrı-ayrı Aİ ölkələri, ABŞ, BMT, NATO və Avropa Şurası Gürcüstanı bu qanun layihəsini qəbul etməkdən imtina etməyə çağırıb.

“Xarici təsirin şəffaflığı haqqında” qanun layihəsində qeyri-hökumət təşkilatlarının və kütləvi informasiya vasitələrinin illik gəlirlərinin 20%-i xaricdən maliyyələşdiyi təqdirdə xarici qüvvələrin maraqlarını təbliğ edən təşkilatların reyestrində qeydiyyata alınması tələb olunur. Onlar ildə bir dəfə bəyannamə doldurmalıdırlar.

Hökumətin 2023-cü ilin martında kütləvi etirazlar zamanı geri götürülmüş qanun layihəsinin yenidən təqdim edilməsinə dair arqumenti o idi ki, şəffaflıq vədlərinə baxmayaraq, xarici donorlar Gürcüstandakı radikal qruplar və partiyalar üçün gizli maliyyəni artırıblar.

Tural