Gürcüstanda siyasi proseslər gərgin olaraq qalır: ölkə parlament seçkiləri ərəfəsində yenidən Qərblə Rusiyanın nüfuz mübarizəsi meydanına çevrilib. Ekspertlər iddia edir ki, sentyabr-oktyabr aylarında Gürcüstanda siyasi proseslər kifayət qədər qarışıq olacaq.

Gürcüstanı nə gözləyir? Payızda keçiriləcək seçkilər bu ölkədə iqtidar dəyişikliyinə, inqilaba, qarşıdurmaya gətirib çıxaracaqmı?

Qafqaz Rusiya ilə ABŞ-ın növbəti dəfə toqquşma meydanına çevriləcək?

Globalinfo.az-a danışan politoloq Qədir Aslan deyib ki, Gürcüstanda vətəndaş cəmiyyəti nümayəndələri və qeyri-hökumət təşkilatlarına ayrılan yardımların kəsilməsi daxili siyasətə təsir edəcək:

“İstər vətəndaş cəmiyyəti nümayəndələri, istərsə də qeyri-hökumət təşkilatları xaricdən maliyyə aldıqları üçün Gürcüstan siyasi həyatında aktiv rol oynayırdılar. Maliyyə imkanlarının kəsilməsi bu aktivliyə təsir edəcək.

Gürcüstan tərəfi bunun siyasi aktivliyə təsir etməyəcəyini desə də, əslində belə deyil. Çünki əhali arasında qrantlarla dolananlar var idi. O ki qaldı seçkilərə, Saakaşvili yetərincə qətiyyətli bəyanat versə, dəyişiklik ola bilər.

Həmçinin aksiyaçılar Saakaşvilinin həbs edildiyi Rustavi həbsxanasının önünə gəlsə, onu yenidən başa gətirə bilərlər. Bu zaman isə Gürcüstanda əsl siyasi mübarizəyə şahidlik edə bilərik. Saakaşvili nə qədər ki Gürcüstandadır, Rusiya bu ölkəyə tam nəzarət edə bilməyəcək.

Gürcüstan hökuməti rəsmi Bakının siyasətini təkrarlayır. Düşünürlər ki, Bakının etdiyi kimi, Rusiya ilə balansı saxlasalar, münaqişələri (Cənubi Osetiya və Abxaziya – red.) həll edəcəklər. Amma reallıq çox fərqlidir, çünki Bakı-Moskva münasibətləri ilə Moskva-Tbilisi münasibətləri çox fərqlidir. Yəni eyni effekti verməyə bilər”.