ABŞ Dövlət katibinin mülki təhlükəsizlik, demokratiya və insan haqları üzrə müavini Uzra Zeya məsləhətləşmələr üçün Gürcüstan və Ermənistana səfər edəcək. Səfər indiki məqamda diqqət çəkir. Belə ki, bir neçə gün öncə Gürcüstanın Avropa Birliyinə inteqrasiya prosesi dayandırılıb. Bunu Avropa Şurasının sammitindən sonra Aİ liderləri çox aydın şəkildə bəyan ediblər. Bundan başqa, ABŞ-ın oktyabrın 26-da Gürcüstanda keçiriləcək parlament seçkilərinin nəticələrinə əsasən hakimiyyət dəyişikliyi həyata keçirmək niyyətində olduğu iddia edilir.

Uzra Zeyanın Gürcüstana səfərin məqsədi nədir? Qərb-Gürcüstan münasibətləri normallaşacaqmı?

Globalinfo.az-a danışan politoloq Məhəmməd Əsədullazadə deyib ki, Avropa İttifaqı Gürcüstanın inteqrasiyası prosesini dayandırıb:

“Həmçinin ABŞ və Almaniya Gürcüstanla birgə hərbi təlimlərdən imtina edib. İttifaq Gürcüstan hökumətinə ayırdığı 10 milyon avronu QHT və media ayıracaq. Bütün bunlara baxmayaraq, Gürcü Arzusu geri çəkilmir. Qalmaqallı “Xarici agentlər” haqqında qanunu qəbul edərək, seçkilərə gedir.

Gürcüstan hakimiyyətinin Qərblə əlaqələri zəiflətməsi iqtisadiyyata mənfi təsir edəcək. Mümkündür ki, proses seçkilərə kimi davam etsin. Əsas məqsəd seçkilərdə hakim partiyanın qalib olmasının qarşısını almaqdır. Gürcüstan hakimiyyətinin anti-Qərb siyasəti birbaşa “boz kardinal” Bidzina İvanaşvilinin təlimatı əsasında həyata keçirilir.

Görünür, Tbilisi Moskva ilə Abxaziya və Cənubi Osetiya məsələsində razılığa gəlməyə çalışır. Gürcüstan hakimiyyəti Qərbi ölkədən tam çıxarır, əvəzində Abxaziya və Cənubi Osetiya üzərində suverenliyini bərpa edir. Həmçinin Rusiyanın orbitinə daxil olur. Əgər Moskva Abxaziya və Cənubi Osetiya məsələsində Tbilisiyə söz veribsə, bu, söz olaraq qalacaq”.