İrəvanın sülh danışıqlardan geri çəkilməsi xəbəri gündəmdə ciddi müzakirələrə səbəb olub. Bununla bağlı Prezident Administrasiyasının Xarici siyasət məsələləri şöbəsinin müdiri, Azərbaycan Prezidentinin köməkçisi Hikmət Hacıyev jurnalistlərin sualını cavablandırarkən bildirib.

O deyib: “Münhen Təhlükəsizlik Konfransında Almaniya kansleri Olaf Şolts görüşün əvvəlində iştirak etmiş və bundan sonra görüş ikitərəfli formatda Azərbaycan və Ermənistan arasında davam etmişdi. Böyük Britaniya tərəfindən ev sahibi olaraq eyni formatlı görüş təklif olunurdu. Amma Ermənistan tərəfi bundan imtina etdi. Belə ki, görüşün əvvəlində Britaniya Baş nazirinin iştirakı, sonra isə görüşün Azərbaycan və Ermənistan arasında davam etməsi formasında olmalı idi. Ermənistanın bu görüşdən imtina etməsini biz onun dialoqdan və sülh gündəliyinin irəli aparılmasından geri çəkilmək niyyətinin bir təzahürü kimi qiymətləndiririk”.

Mövzunu Globalinfo.az-a şərh edən politoloq Qədir Aslan deyib ki, Paşinyan məzuniyyətdədir və bunu əsas gətirərək danışıqlardan imtina edir:

“Hesab edirəm, bu, tərəflər arasında gedən danışıqlara ciddi təsir etməyəcək. Prinsip etibarilə hər iki ölkə lideri sülhə dair yanaşmalarını açıq ifadə edib. Bundan başqa, görüşlər də keçirilir.

Öncəki görüşlərdə əldə edilən razılaşmalar icra edilir. Ermənistanın son zamanlar sərgilədiyi mövqe də diqqət çəkir. Yəni bir görüşün baş tutmamasını ümumi mənada danışıqların bitməsi kimi qiymətləndirməzdim. Qarşıda başqa görüşlər olacaq. Ermənistan sülhdən yayınsa, bunun cavabını artıqlaması ilə alacaq”.

Analitik Aqşin Kərimov isə deyib ki, Azərbaycan və Ermənistan liderlərinin Londonda bir araya gəlməsi gözlənilirdi:

“Bu görüş baş tutsaydı, şübhəsiz, sülh müqaviləsinə böyük töhfə verə bilərdi. Çünki Londan liderlərin bir araya gələcəyi yeni məkan idi. Bu o baxımdan vacibdir ki, London münasibətlərin tənzimlənməsində pozitiv rol oynaya bilər.

Görüş baş tutmadı. Bu da hardasa gözlənilirdi. Çünki proqramda belə bir şey yox idi. Yəni ehtimal görüş gözlənilirdi, amma dəqiq qərar yox idi. Artıq tərəflər arasında vasitəçi yoxdur. Yəni daha bu termindən istifadə etmirik. İkitərəfli razılaşmalar olduğu üçün buna zərurət də yoxdur. “Təşəbbüskarlar” ifadəsindən istifadə etmək daha doğru olardı.

İstənilən halda Londonda aparılacaq müzakirələrdə Ermənistan-Azərbaycan sülh prosesi müzakirə ediləcək və bu belə özlüyündə müsbət haldır”.