“Türkiyə ilə Rusiya müxtəlif platformalarda uğurlu əməkdaşlıq tempinə malikdir. İki ölkənin fərqli sahələrdə etdiyi əməkdaşlıq faktiki olaraq ildən-ilə artır. Moskva Ankara ilə münasibətlərin yaxşı qalmasında maraqlıdır. Hətta bunun üçün müəyyən məsələlərdə Türkiyənin təkliflərini qəbul edir, güzəştə gedir”.

Bu sözləri Globalinfo.az -a politoloq Tural İsmayılov Türkiyə Pezidenti Rəcəb Tayyib Ərdoğanla Rusiya Prezidenti Vladimir Putin arasında Astanada baş tutan görüşü şərh edərkən deyib.

Onun sözlərinə görə, Akkuyu atom elektrik stansiyasının tikilməsi Türkiyə-Rusiya əməkdaşlığının nəticəsidir:

“Türkiyə tək NATO ölkəsidir ki, Rusiya-Ukrayna müharibəsində tərəfləri qızışdırmır, əksinə, sülh üçün vasitəçi olmağa çalışır. Yeri gəlmişkən, Kremlin mətbuat katibi Dmitri Peskov dünən “Birinci Kanal”ın efirində dedi ki, Türkiyə Prezidenti Rəcəb Tayyib Ərdoğan Ukrayna münaqişəsinin həlli üzrə danışıqlarda mümkün vasitəçi rolunda çıxış etməyəcək. Bunu hər halda zaman göstərəcək.

Ümumi mənada dünən Astanada baş tutan Ərdoğan-Putin görüşü çox mühüm idi. Bu iki lider bu gün faktiki olaraq dünya siyasi proseslərinə yön verir, regionun gələcəyində söz sahibidir. Bu mənada görüş zamanı regional geosiyasi və iqtisadi məsələlərin müzakirə edildiyini demək olar.
İki ölkə fərqli coğrafyalarda siyasi, hərbi təsir gücünə sahibdir və bəzən maraqları kəsişir. Lakin tərəflər arasında kosneptual ziddiyyətlər yoxdur. Görüşün ən mühüm tərəfi isə Ərdoğanın Putini Türkiyəyə səfərə dəvət etməsi oldu. Görünür, bu ikili daha spesifik mövzuları Türkiyədə müzakirə edəcək”.