ABŞ prezidenti Co Bayden Rusiya ərazisinə Amerika silahları ilə hücumlara qoyulan qadağanı ləğv edə bilər.

Publika.az xəbər verir ki, bu barədə "The New York Times" yazır.

Qeyd edilir ki, Ağ Evin rəhbəri uzun müddət Kiyevə Rusiyanın daxilində Amerika silahlarından istifadə etmək icazəsinin verilməsinə qarşı olub, çünki bu nüvə silahı olan düşmənlə Amerikanın birbaşa qarşıdurmasına çevrilə bilər.

İndi isə Ukrayna prezidenti Vladimir Zelenskinin məhdudiyyətlərlə bağlı aylardır şikayətlərindən sonra Ağ Ev riskə gedib-getməməyi yenidən müzakirə edir. Nəşr qeyd edir ki, Amerika silahlarından davamlı istifadənin təsdiqlənməsi Kiyevə Rusiyanın artilleriya və raket obyektlərinə əks-hücum imkanı verəcək.

Qeyd edək ki, ABŞ dövlət katibi Antoni Blinken mayın 29-da Moldovada Bayden administrasiyasının Amerika silahlarından istifadə edərək Rusiyaya hücumlarla bağlı mövqeyini düzəldə biləcəyi ehtimalını açıq və aydın şəkildə etiraf edən ilk administrasiya rəsmisi oldu.

“Ukraynanın özünü effektiv şəkildə müdafiə etməsi üçün biz həmişə nəyin lazım olduğuna dair qərarlar qəbul edirik”, - Blinken Moldovada bildirib.

NATO-nun səlahiyyət müddəti başa çatan baş katibi Yens Stoltenberq isə ötən həftə bildirmişdi ki, Ukraynanın ərazilərini itirməsi yalnız Kiyevin Rusiya tərəfindəki artilleriya və raket qurğularına və komanda məntəqələrinə atəş açmaqda sərbəst olduğu halda kompensasiya edilə bilər.

Fransa və Almaniya liderləri də bu fikrə qoşuldular. Böyük Britaniya artıq silahlarının Rusiya ərazisində hərbi məqsədlər üçün istifadəsinə icazə verir.

Məqalədə qeyd olunur ki, Bayden indiyə qədər səssiz qalıb. Ağ Evdəki müzakirələr haqqında danışmaqdan imtina edən bəzi məsləhətçiləri onun mövqeyində dəyişikliyin qaçılmaz olduğuna inandıqlarını söyləyirlər.

Qəzetin yazdığına görə, Bayden çox güman ki, Rusiya ərazisinin dərinliklərinə və ya kritik infrastruktura zərbələr endirmək üçün Amerika silahlarından istifadəyə qadağa qoyacaq. Bu məsələdə onun müttəfiqlərindən müəyyən dəstək var – məsələn, Almaniya kansleri Olaf Şolz Moskvaya çata biləcəyindən ehtiyat edərək, Ukraynaya alman “Taurus” uzaqmənzilli raket kompleksini verməkdən imtina edib.

Rəsmilər etiraf edirlər ki, Bayden kursunu dəyişəcək, lakin çox güman ki, bunu heç vaxt elan etməyəcək - bunun əvəzinə Amerika artilleriya mərmiləri və raketləri sadəcə olaraq Rusiyadakı hərbi hədəfləri vurmağa başlayacaq, - məqalədə qeyd olunur.

Rusiya Ukraynaya silah tədarükü ilə bağlı NATO ölkələrinə nota göndərib. Xarici işlər naziri Sergey Lavrov qeyd edib ki, alyans ölkələri Ukraynaya silah yardımı etməklə “odla oynayır”. Beləliklə, blok və ABŞ, Lavrovun fikrincə, münaqişədə birbaşa iştirak edir və bu, onun həllinə kömək etmir. Xarici İşlər Nazirliyi qeyd edib ki, Ukrayna üçün silah olan istənilən yük Rusiya üçün qanuni hədəfə çevriləcək. Kreml vurğulayıb ki, Ukraynanı Qərbdən silahlarla doldurmaq Rusiya-Ukrayna danışıqlarının uğuruna kömək etmir və mənfi təsir göstərəcək.

Adəm Abbaslı