Ermənistandakı vəziyyət təbii ki, nikbinlik yaratmır. Ermənistan rəhbərliyi, düzünü desək, son üç ilin tarixini təhrif edərək, uydurma bəhanələrlə bilərəkdən Rusiya Federasiyası ilə münasibətlərin pozulmasına, 102-ci hərbi bazada xidmət edən hərbi qulluqçularımızın böhtana məruz qalmasına səbəb olur.

Publika.az xəbər verir ki, bunu martın 29-da Rusiyanın xarici işlər naziri Sergey Lavrov “İzvestiya”ya müsahibəsində deyib.

“Çətin vəziyyətlərdə Ermənistanın maraqlarını məhz KTMT dəfələrlə müdafiə edib. KTMT Ermənistanla Azərbaycan arasında münasibətlərdə gərginliyi azaltmaq üçün 2021-ci ildə öz sülhməramlı missiyasını respublikaya göndərməyə hazır olduğunu bildirdi. Hətta 2021-ci ilin payızında İrəvanda keçirilən nazirlərin görüşündə missiyanın tərkibi tam razılaşdırıldı - biz gecəyə qədər oturduq, hər şeyi təsdiq etdik, səhər prezidentlər və baş nazirlər artıq görüşəndə, cənab Paşinyan dedi ki, heç bir konsensus yoxdur”, - Lavrov deyib.

Lavrovun sözlərinə görə, bir neçə gün sonra Paşinyan Avropa İttifaqının eyni sülhməramlı missiyasını Ermənistana çağıraraq, Azərbaycana bunun cəmi iki aylıq olacağını vəd edib. İki ay sonra isə Bakıya məhəl qoymayaraq, Avropa İttifaqı bu missiyanı ikiqat artırıb.

“İndi də Norveç, Kanada və ABŞ-dan hərbi personal hələ də oraya göndərilir və Avropa İttifaqının missiyasını Şimali Atlantika Alyansının missiyasına çevirirlər. Və son bir neçə ilin bütün bu hekayəsi cənab Paşinyan, onun əməkdaşları və Ermənistan parlamentinin rəhbərliyi tərəfindən təhrif olunur”, - Lavrov qeyd edib.

Tural