"Paşinyanın bu cür bəyanatlar səsləndirməsi yalnız və yalnız beynəlxalq ictimaiyyətdə özlərinin sülhpərvər imicini yaratmağa hesablanıb".

Bunu Publika.az-a açıqlamasında politoloq Yusif Bağırzadə Ermənistanın baş naziri Paşinyanın Tbilisidə “sülhə hazırıq” bəyanatını şərh edərkən deyib.

O bildirib ki, Paşinyanın belə bir təəssürat yaratmağa çalışmaqda məqsədi sanki sülh çağırışına “yox” deyənin Ermənistan yox, Azərbaycan olduğunu göstərməkdir:

"Paşinyan artıq uzun müddətdir ki, Azərbaycanla sülh sazişi imzalamağa hazır olduğu və Azərbaycanın ərazi bütövlüyünü tanıdığı ilə bağlı açıqlamalar verir. Amma hər dəfə də onun bəyanatları ilə atdığı addımlar arasında bir tərs mütənasiblik olduğunu görürük.

Məsələn, o, dəfələrlə ən yüksək tribunalardan, istər Rusiya, istər Avropa İttifaqı, istərsə də ABŞ vasitəçiliyi ilə aparılan danışıqlarda Azərbaycanın ərazi bütövlüyünü 86.6 min kv. kilometr çərçivəsində tanıdığını desə də, bu ilin sentyabr ayının 2-də keçmiş qondarma rejimin ildönümündə yenə də “artsax” deyib hansısa təhlükəsizlik zəmanətindən danışmaqla əsl simasının nədən ibarət olduğunu göstərdi. Və ya xunta rejiminin özünü buraxmasından sonra “etnik təmizləmə” iddiaları ilə ölkəmizin əleyhinə kampaniya aparmağa başladı.

İndi də onun bu cür bəyanatlar səsləndirməsi yalnız və yalnız beynəlxalq ictimaiyyətdə özlərinin sülhpərvər imicini yaratmağa hesablanıb”.



Ekspert qeyd edib ki, Azərbaycan sülh danışıqlarında artıq öz mövqeyini ortaya qoyub:

"Azərbaycan beş baza prinsipi əsasında, qarşılıqlı maraqlar çərçivəsində sülh müqaviləsinin imzalanmasının tərəfdarıdır. Sülh sazişinin imzalanmasından qaçan və hər dəfə yeni bir bəhanələr uyduran məhz Ermənistandır. Paşinyanın bu cür mövqe sərgiləməsi, yəni bir cür danışıb başqa cür addım atması isə Ermənistanın müstəqil ölkə, Paşinyanın isə müstəqil şəxs olmaması ilə bağlıdır. Paşinyan indiki zamanda sülhün məhz Ermənistan üçün vacib olduğunu anlasa da, sərbəst və azad şəkildə qərarlar qəbul edə bilmir. Başqa sözlə desək, Ermənistanın sülh müqaviləsinə imza atması onun havadarlarının, yəni Ermənistandan alət kimi istifadə edib Cənubi Qafqazda öz maraqlarını təmin etmək istəyən qüvvələrin razılığından keçir. Onlar isə istədiklərinə nail ola bilmədikləri üçün Paşinyana təzyiq göstərirlər.

Əgər Paşinyan nəhayətdə özündə bu təzyiqlərə davam gətirmək cürətini göstərəcəksə, ayrı-ayrı havadarlarının deyil, məhz Ermənistanın maraqlarından çıxış edəcəksə, o zaman sülh sazişi də imzalanacaq. Yox, əgər bunu etməyəcəksə, o zaman uduzan yenə Ermənistan olacaq. Çünki Azərbaycan artıq öz ərazi bütövlüyünü də, suverenliyini də bərpa edib. Beynəlxalq səviyyədə tanınan sərhədləri daxilində möhkəmlənməyə də davam edir. Eyni şəkildə Azərbaycan işğal altında olan səkkiz kəndimizdə də bayrağını dalğalandırmaq gücündə və iqtidarındadır. Ermənistan isə bu cür mövqeyi ilə yenə də beynəlxalq layihələrdən kənar qala, cənab Prezidentin də qeyd etdiyi kimi “dalan ölkə” olmaqda davam edə bilər".

Nəzrin Cavadzadə