Rusiya və Türkiyə media məkanında bədxahlardan gələn saxtakarlıq və dezinformasiya ilə mübarizə aparmaq üçün birgə işləməli, həmçinin bu sahədə qarşılıqlı əlaqələri inkişaf etdirməlidir.

Publikia.az xəbər verir ki, bunu Rusiyanın xarici işlər naziri Sergey Lavrov “Rusiya-Türkiyə: əməkdaşlığın gücləndirilməsində medianın rolu” mövzusunda Moskvada keçirilən dəyirmi masa iştirakçılarına müraciətində deyib.

“Ümumi informasiya çağırışları və təhdidləri ilə mübarizədə iki ölkə mediasının koordinasiyalı fəaliyyəti, bədxahlarımız tərəfindən yayılan dezinformasiyanın nəticələrinin qarşısını almaq üçün qarşılıqlı fəaliyyət alqoritmlərinin hazırlanması vəzifəsi ön plana çıxır. Media məkanında müxtəlif növ saxtakarlıqlara və təxribat xarakterli məlumatlara qarşı birgə mübarizə aparmaq lazımdır”, - Lavrov müraciətində bildirib.

Nazir Rusiyada akkreditə olunmuş türk jurnalistlərə köməklik göstəriləcəyini vəd edərək, Ankaranın Rusiya Federasiyasından olan jurnalistlərə də oxşar münasibət sərgiləyəcəyinə ümid etdiyini bildirib. Bundan əlavə, Lavrov qeyd edib ki, hazırkı beynəlxalq şəraitdə “ölkələrimiz və ikitərəfli əməkdaşlıq ətrafında əlverişli informasiya fonunun saxlanması xüsusilə tələb olunur”.