Ermənistanın xarici ticarətində Ermənistan-Türkiyə ticarətinin payı 1%-dir. İrəvanla Ankara arasında birbaşa ticarətə başlanacağı təqdirdə bu rəqəm 10% və ya daha çox arta bilər.
Publika.az "SputnikArmenia"ya istinadən xəbər verir ki, bu barədə Ermənistanın İqtisadiyyat Nazirliyi məlumat yayıb.
Məlumata görə, nazirliyin bu məsələ ilə bağlı öz təhlilləri yoxdur və məlumatlar orta hesabla götürülüb. Bir sıra beynəlxalq qurumların proqnozlarına istinad edilib.
Belə ki, Dünya Bankı Ermənistandan Türkiyəyə ixrac potensialının ölkənin ÜDM-nin 15-19%-ni təşkil etdiyini bildirir. Almaniyanın “German Economic Team” konsaltinq şirkətinin fikrincə isə İrəvanla Ankara arasında birbaşa ticarətin açılması Ermənistandan Türkiyəyə ixracın payının 6,7%-ə qədər artması və Türkiyədən idxalın 12,8%-ə artması ilə nəticələnə bilər.
Eyni zamanda, Asiya İnkişaf Bankı (AİB) hətta Azərbaycan və Türkiyə ilə sərhədin açılacağı təqdirdə Ermənistanın xarici ticarət kəsirinin 30-50% azalacağını proqnozlaşdırır. “Dənizə çıxışı olmayan istənilən respublika üçün qonşu ölkələr təkcə ticarət bazarı deyil, həm də üçüncü ölkələrə tranzit yollarıdır”, - məlumatda deyilir.
Nazirlik vurğulayıb ki, iki qonşu ölkə (Azərbaycan və Türkiyə) ilə sərhədin bağlanması Ermənistanın xarici ticarət imkanlarını azaldır, yükdaşımaları üçün alternativ marşrutları məhdudlaşdırır. Bu da ölkənin yükdaşıma bazarında rəqabət qabiliyyətinə mənfi təsir göstərir.
Hazırda Ermənistan Logistika Effektivliyi İndeksində 186 ölkə arasında 96-cı yerdədir. Dünya İnkişaf Bankı hesab edir ki, Ermənistan və Türkiyə arasında yoldan istifadə maliyyə faydalarından əlavə, yükdaşıma və xidmətlərin əlçatanlığının artmasına səbəb olacaq. Bunun təkcə Ermənistan üçün deyil, region ölkələri üçün də faydalı olacağı qeyd edilir.
İqtisadiyyat Nazirliyi Türkiyədən keçən quru marşrutunun Ermənistanın Gürcüstan ərazisindən yükdaşımalarının həcminin azalmasına səbəb ola biləcəyini istisna etmir. "Bu, yeni marşrutun daha az xərc çəkdiyi və daşıyıcılara, xüsusən də üçüncü ölkələrlə ticarətə daha sərfəli olacağı təqdirdə baş verə bilər", - nazirlik bildirib.
Hazırda Türkiyənin Ermənistana ixracında əsas payı, yəni 99,9%-i quru yolun (Gürcüstan ərazisindən keçməklə) üzərinə düşür və yalnız 0,01%-i hava yolu ilə çatdırılır. 2022-ci ilin sonunda Türkiyə Ermənistana hava yolu ilə 3,1 ton, Gürcüstan vasitəsilə isə yük maşınları ilə 24 903,8 ton yük idxal edib.
Mehti Kamiloğlu