Ukraynanın xarici işlər naziri Dmitri Kuleba Kiyevin “bütün cəbhələrdə” qalib gələcəyinə əmin olduğunu bildirib.

Publika.az xəbər verir ki, o, bu barədə jurnalist Vadim Karpyakla söhbətində deyib. Eyni zamanda, o, Ukrayna üçün “ağır payız” olacağını proqnozlaşdırıb.

"Çox çətin siyasi mövsüm olacaq, mən hamını xəbərdar edirəm", - “RBC-Ukrayna” Kulebanın sözlərindən sitat gətirib.

Ukraynalı nazir qeyd edib ki, müxtəlif ölkələrdə Rusiya ilə danışıqların zəruriliyi ilə bağlı “səslər” getdikcə ucalır.

Kuleba Ukraynanın beynəlxalq hüquq və cinayət hüququ çərçivəsində “bu səslərin sönməsi üçün” hər şeyi edəcəyinə söz verib.

O əlavə edib ki, çoxlu sayda çətin beynəlxalq sammitlərdə Kiyevə təkcə Aİ və Şimali Amerikadan olan ənənəvi dostların deyil, həm də digər ölkələrin keyfiyyət və kəmiyyət baxımından iştirakı lazım olacaq.