İsrailin xarici işlər naziri Eli Koen Səudiyyə Ərəbistanı ilə diplomatik münasibətlərin qurulması ilə bağlı razılığın əldə edilməsinin “an məsələsi” olduğunu deyib.
Publika.az xəbər verir ki, sazişin ABŞ-ın da maraqlarına uyğun olduğunu ifadə edən Koen, “ABŞ prezidenti Co Bayden administrasiyası 2024-cü il prezident seçkilərindən əvvəl siyasi bir uğur istəyir”,- deyə bildirib.
“Amerikalılar iqtisadiyyatla da maraqlanırlar. ABŞ və Səudiyyə Ərəbistanı arasında razılaşma enerji xərclərini azalda bilər. Səudiyyəlilər də İrana qarşı müdafiə axtarırlar”,- deyə İsrailli nazir açıqlayıb.
Ağ Ev Milli Təhlükəsizlik Şurasının Strateji Kommunikasiyalar Koordinatoru Con Kirbi isə dünən verdiyi açıqlamada xəbərin əksinə olaraq razılaşdırılmış danışıqlar seriyasının olmadığını vurğulamışdı. O “düşünürəm ki, bu xəbər bəzi insanlarda danışıqların əslində olduğundan daha qəti mərhələdə olduğu təəssüratı yaradıb”,- deyə ifadə edib.
"Buna çatmazdan əvvəl çoxlu müzakirələr aparılmalıdır. Uzun sözün qısası, razılaşdırılmış danışıqlar ardıcıllığı yoxdur. Normallaşmanı və ya bizim, dostlarımızın bölgədə sahib olduğu digər təhlükəsizlik mülahizələrini tənzimləmək üçün razılaşdırılmış bir çərçivə yoxdur",- o əlavə edib.
Nəzrin