Rusiya rublu xarici valyutalara nəzərən ucuzlaşmağa davam edir. Avqustun 9-na olan proqnoza görə isə rubl dünyanın ən zəif valyutalarının ilk üçlüyünə daxil olub. Türkiyədə isə lirə də yeni kritik həddə yaxınlaşmaqdadır. Hazırda 1 dollar 27 lirə ilə dəyişdirilir. Vurğuladığımız ölkələr Azərbaycanın əsas ticarət tərəfdaşlarıdır.

Belə olduğu təqdirdə Azərbaycan iqtisadiyyatı və manatı üçün hansı təhlükələr yaranır?

Məsələ ilə Bağlı Referans.az-a danışan iqtisadçı Natiq Cəfərli bildirib ki, bunun həm mənfi, həm də müsbət təsirləri olacaq:

“Hazırda dünyada ən sürətlə dəyərdən düşən üçüncü valyuta rus rubludur. Azərbaycana təsirləri bundan ibarətdir ki, Rusiya həm də bizim idxal etdiyimiz ölkədir. Məntiqlə baxsaq, həmin məhsullarda ucuzlaşma olmalıdır, çünki biz məhsulları valyuta ilə alırıq. Orada isə rublun ucuzlaşması valyuta ilə alınan malların qiymətinə təsir edir. Valyuta isə sabit məzənnə rejimidir. Buna görə də Rusiyadan alınan məhsullarda ucuzlaşma olmalıdır”.

İqtisadçı bildirib ki, rublun ucuzlaşması Rusiyada yaşayan soydaşlarımıza, eləcə də Azərbaycandan Rusiyaya pul göndərmək istəyənlərə mənfi təsir edəcək: “Bizim Rusiyada yüz minlərlə soydaşımız yaşayır və onlar aylıq qazanclarını rublla təmin edirlər. Rubl da dəyərdən düşdükcə ona dollar, valyuta almaq və Azərbaycana göndərmək daha da çətinləşir. Rusiyada rublun ucuzlaşması Azərbaycana ailələrinə göndərilən vəsaitlərin həcmində ciddi problemlər yarana bilər”.

Həcmlər azala bilər ki, bu da regionlarda yaşayan və Rusiyadan gələn gəlirlə gününü keçirən və ya dolanışıqlarını təmin edən vətəndaşlar yaxud ailələrə ciddi təsir edə bilər – deyə Natiq Cəfərli qeyd edib.

Aqil Qarayev