"Ekoloji terroru əhatə edən hüquqi təqib vəsatətləri gec də olsa, Ermənistan üçün çoxmilyardlıq təzminatlara gətirib çıxaracaq. Müasir dövrdə ekoloji təhlükəsizlik milli təhlükəsizliyin ən vacib elementlərindəndir. Bu isə qlobal təhlükəsizliyi formalaşdıran bəndlərdən biridir".

Bunu Publika.az-a açıqlamasında politoloq Yeganə Hacıyeva bildirib.

Onun sözlərinə görə, bu bəndin hər hansının sıradan çıxarılması dünyada hər gün pisləşməkdə olan ekoloji vəziyyətin daha da ağırlaşmasına səbəb olacaq addımlardandır. Ermənistan isə bu addımları sistemli şəkildə, dövlət siyasəti olaraq həyata keçirir:

"Ermənistanın qonşu dövlətlərə münasibəti həmişə ekoloji təcavüzlərlə xarakterik olub. İstər 30 il ərzində torpaqlarımızın işğal altında saxlanıldığı müddətdə, istərsə də aradan keçən 2 il 8 ay ərzində Ermənistan Azərbaycan ərazilərində ekoloji genosid həyata keçirib.

Ermənistan işğal illərində şəhərləri, təbiətin flora və fauna təbəqəsini, şirin su hövzələrini dağıdıb, yeraltı termal su ehtiyatlarının quruması üçün sistemli fəaliyyət aparıb.

Bunun nəticəsində cənnət zonaları olan Azərbaycan torpaqları işğal illərində ağacların, meşələrin quruması ilə xarakterik olub. Biz bu halı daha çox Kəlbəcər və Laçında görmüşük.

Onu da qeyd etmək lazımdır ki, bu, 50% Ermənistan cəmiyyətinin təbiətə və bəşəri dəyərlərə yönəlik vəhşi yanaşmasından irəli gəlir. Digər 50% isə Ermənistanın sistemli şəkildə həyata keçirdiyi dövlət siyasətidir. Azərbaycan torpaqlarının şoranlaşdırılması, çirkləndirilməsi həmişə Ermənistanın siyasəti olub".

Politoloq bildirib ki, Ermənistan Azərbaycana qarşı aktiv şəkildə ekosid və urbansid fəaliyyətləri həyata keçirib:

“Yəni təbiətdən savayı, həm də şəhərlər, qəsəbələr soyqırımına məruz qalaraq yer üzündən silinib. Azərbaycan Ermənistana qarşı beynəlxalq hüquqi instansiyalara şikayətlər təqdim edib.

Son illər bir çox beynəlxalq təşkilatlarda ekoloji cinayətlərlə bağlı çoxsaylı - milyardalar dəyərində tədqiqat, istintaq işlərinin aparılması üçün mexanizmlər işlənilib. Ancaq Ermənistana münasibətdə bu mexanizmlər həmişə yan keçib.

Bu məsələlərdən Ermənistanın cəzalandırılmaması və ya bu tip təşəbbüslərin göstərilməməsi onu başqa yeni buna bənzər cinayətlər etməyə sövq edir.

Hazırda Ermənistanla şərti sərhəd mövcuddur. Sərhədlərin dəqiq delimitasiyası və demarkasiyası aparılmadığı üçün Azərbaycan i bunu təktərəfli aparmaq məcburiyətindədir. Çünki bu, bizim legitim haqqımızdır. Eyni ilə sərhəd təhlükəsizliyi üçün bufer zonaların müəyyənləşdirilməsi, formalaşdırılması da bizim haqqımızdır.

Sərhəd müəyyənləşdirilmədiyi üçün Ermənistanın ekoloji fəsadlar yayacaq zavodunun tikilməsi özü avantüradır, çünki ərazidə sərhəd müəyyənləşməyib".

Y. Hacıyeva bu gün işğal altında qalan Kərki kəndi ilə Naxçıvan arasında yerləşən Arazdəyəndə metallurgiya zavodu inşa edən Ermənistanın zavod ərazisində ABŞ bayrağını qaldıracağına dair məlumata, münasibətində isə qeyd edib ki, bu, Ermənistanın ABŞ-ı regionda müharibəyə cəlb etmək cəhdidir:

"Digər bir məqam həmin şirkətlərin həqiqətən ABŞ şirkətləri olub-olmadığını dəqiqləşdirməkdir. Çünki həmin şirkətlər ABŞ vətəndaşı olan etnik ermənilərin də ola bilər və ya hər hansı ofşor şirkət ola bilər. Bu, ümumilikdə heç nəyi dəyişmir amma bu çox ermənicə, hiyləgər cəhddir. Məsələnin bir tərəfi də Ermənistanın məhz münaqişəni genişləndirmək və yeni tərəfdaşlar axtarmaq istiqamətində uğursuz və primitiv səylərindən biridir".

Gülnar