Bu gün Bakıda Azərbaycan tərəfinin vasitəçiliyi ilə İsrail və Türkiyə nümayəndələri arasında danışıqlar keçiriləcək. Bu görüş, uzun müddətdir davam edən gərginlikləri yüngülləşdirmək və tərəflər arasında əlaqələri normallaşdırmaq məqsədini daşıyır. Azərbaycan, həm Türkiyə, həm də İsraillə yaxşı əlaqələrə sahib olan və hər iki ölkə üçün strateji əhəmiyyət kəsb edən bir tərəf olduğundan bu vasitəçilik mühüm əhəmiyyət daşıyır.

Globalinfo.az-a danışan politoloq Rəşad Bayramov deyib ki, Azərbaycan, ilk dəfə deyil Türkiyə və İsrail arasında vasitəçi rolunda çıxış edir və bu, təbiidir:

“Azərbaycan həm Türkiyə, həm də İsraillə sıx və yaxşı münasibətlərə malik bir ölkə olaraq, bu iki dövlət arasında mövcud olan problemlərin aradan qaldırılmasında maraqlıdır. Hər iki dövlətin Azərbaycan üçün əhəmiyyəti və verdikləri dəstək açıqdır. Buna görə də, Azərbaycan zaman-zaman Türkiyə və İsrail arasında yaranan fikir ayrılıqlarını həll etmək üçün müvafiq təşəbbüslərlə çıxış edir.

Son olaraq, aprel ayında Bakıda keçirilən Türkiyə və İsrail arasındakı görüş bunun bariz nümunəsidir. Həmin görüşdə Suriyadakı gərginlik əsas müzakirə mövzusu olub və böyük ehtimalla, tərəflər yenidən Suriyada Türkiyə ilə İsrail arasında hərbi toqquşma təhlükəsini müzakirə edəcəklər”.

Politoloqun sözlərinə görə, ilk görüşlə bağlı ətraflı məlumatlar açıqlanmasa da, İsrailin maksimalist mövqedən çıxış etdiyi barədə bəzi məlumatlar mövcuddur:

“İsrail nümayəndə heyəti, Türkiyəyə Suriyada xarici qüvvələrin yerləşdirilməsinə və Tadmor bölgəsində yeni türk hərbi bazalarının yaradılmasına qarşı olduqlarını bildirmişdi. İsrail bu mövqeyini öz təhlükəsizlik maraqları ilə əsaslandırmağa çalışır. Türkiyə isə İsraildə daxil olmaqla heç bir ölkə ilə Suriyada münaqişəyə girəcəyini düşünmür, lakin Suriyanın, yenidən Türkiyənin milli təhlükəsizliyini təhdid edəcək daxili qarışıqlıqlara, əməliyyatlara və ya təxribatlara məruz qalmasına seyrçi yanaşmayacağını bəyan edib.

Bu günlərdə yenidən keçiriləcək görüş, tərəflərin, xüsusilə də İsrailin ilkin mövqeyini yumşaltması ilə nəticələnə bilər. Verilən məlumata görə, bu dəfəki görüşdə İsrail, öz sərhədləri yaxınlığında silahlı birləşmələrin mövcudluğunun istisna edilməsi və strateji silah növlərinin Suriyada yerləşdirilməməsi məsələsini qaldırmağı planlaşdırır.

Düşünürəm ki, bu istiqamətdə müəyyən razılaşmalar əldə etmək mümkündür. Əks halda, İsrail Türkiyə ilə toqquşmaq məcburiyyətində qalacaq ki, bu da İsrailin hazırda müxtəlif cəbhələrdə döyüşdüyü bir vəziyyətdə arzuolunan deyil.

İstənilən halda, rəsmi Bakının vasitəçiliyi tərəflərə mübahisələri və fikir ayrılıqlarını hərb meydanında deyil, masa arxasında müzakirə yolu ilə həll etmək fürsəti təqdim edir. Tərəflərin, xüsusilə də İsrailin bu fürsəti necə dəyərləndirəcəyini zaman göstərəcək. Ancaq, əminliklə deyə bilərik ki, Bakıda keçiriləcək danışıqlar, regionun iki əsas ölkəsi arasında gərginliyin azaldılması və münaqişələrin qarşısının alınması istiqamətində mühüm bir addım olacaq”.