SSRİ-yə məxsus yarım tonluq “Kosmos-482” stansiyasının yaxın günlərdə Yerə düşəcəyi barədə xəbərlər ictimaiyyətdə narahatlıq doğurub. İddia edilir ki, sözügedən kosmik gəmi Azərbaycana da düşə bilər. Bildirilir ki, aparat tamamilə quru üzərinə, güman ki, Misir, Suriya, Türkiyə və Azərbaycan ərazisinə düşə bilər.

Sovetin kosmik stansiyası Azərbaycana düşə bilərmi? Belə cisimləri havada vurub sıradan çıxarmaq və ya təhlükəsiz yerə yönləndirmək mümkündürmü?

Globalinfo.az-a danışan Nəsrəddin Tusi adına Şamaxı Astrofizika Rəsədxanasının icraçı direktoru, professor Nəriman İsmayılov deyib ki, bu məsələdə yalnız NASA-ya inanmaq lazımdır:

“Məlumata görə, peykin qalıqları 10 mayda atmosferə daxil olacaq. Qeyd edim ki, sözügedən peyk 1972-ci il martın 31-də Sovet İttifaqı tərəfindən kosmosa atılmışdı. Müəyyən texniki nasazlığa görə, onunla əlaqə kəsilmişdi. İndi Yerə yaxınlaşıb. Baxmayaraq ki, materialı möhkəm metaldandır, atmosferdə kütləsini itirəcəyi ehtimal olunur. Bu səbəbdən qismən də olsa, yanacaq”.

Professorun sözlərinə görə, NASA peykin istənilən əraziyə düşə biləcəyini açıqlayıb:

“Heç bir ölkənin adı çəkilmir. Yerin istənilən ərazisi bu zərbənin altında qala bilər. Düşünün, Misirlə Azərbaycan arasında neçə dövlət yerləşir?! Suriya, İsrail, İordaniya, Fələstin, nəhayət, Azərbaycana çatmamış Ermənistan da var. Niyə onların adı çəkilmir? Bu məlumat saxtadır, sadəcə narahatlıq yaratmaq üçün yayılır. Ümumiyyətlə, kosmik aparatın Qafqaza düşmə ehtimalı azdır. Lakin ərazimizə gələrsə, Hava Hücumundan Müdafiə Qüvvələri onu vurmaq imkanlarına malikdirlər. Əslində, böyük sürətlə atmosfera daxil olan cismi havada vurub sıradan çıxarmaq mümkündür. Yerə düşməsi isə böyük fəlakətlə nəticələnər”.