Yəmənin paytaxtı Sənaya budəfəki irimiqyaslı zərbələr ənənəvi hərbi hücumlardan daha dərin məna kəsb edir. Bu, Yəmən coğrafiyasının hüdudlarını aşan və İran-ABŞ-İsrail münaqişəsi ilə birbaşa əlaqəli daha mürəkkəb siyasi-strateji mesajlarla dəstəklənirdi.

Teleqraf xəbər verir ki, bu barədə “Sky News Arabia”nın təhlilində deyilir.

Qeyd olunur ki, İranın Yəməndəki rolu, husilərə hərbi dəstəyi artdıqca, Vaşinqton və Tel-Əviv Yəmən arenasını Tehrana dolayı təzyiq göstərə biləcəyi təsiredici amil kimi görməyə başlayıb.

Yəmənli hərbi ekspert Xalid əl-Nasinin fikrincə, son hücumlar bir neçə cəbhədə İranın təsirinə qarşı İsrailin rəhbərlik etdiyi eskalasiya dalğasından ayrı deyil.

Əl-Nasi İsrailin hücumları ABŞ ilə koordinasiyalı şəkildə həyata keçirdiyini iddia edir: “İsrail Yəmənə İrana onu cənubdan mühasirəyə almağa imkan verən strateji nöqtə kimi baxır və bu, cavabsız qalacağı təqdirdə ekzistensial təhlükə yarada bilər. Hücumlarla iki mesaj verilir: husilərə xəbərdarlıq və İrana Sənadan çıxmağa alternativin olmadığı siqnalı”.

Ekspertə görə, İsrail Amerikanın dəstəyi ilə döyüş qaydalarını dəyişdirir, İrandan əvvəl onun Yaxın Şərqdəki proksi qüvvələrini sıradan çıxarır.

BƏƏ-dən olan analitik Məhəmməd əl-Zaqul hesab edir ki, İran husilərdən təkcə hərbi vasitə kimi yox, həm də nüvə və iqtisadi sanksiyalar da daxil olmaqla bir çox məsələlərdə Qərbə təzyiq üçün strateji rıçaq kimi istifadə edir:

“Sənaya reydlər İranın bölgədəki proksilərini, xüsusilə Qırmızı dəniz və beynəlxalq su yollarının təhlükəsizliyini təhdid edən qrupları hədəf alaraq, onların manevr imkanlarını azaltmaq məqsədi daşıyır”.

Əl-Zaqul iddia edir ki, zərbələrin ABŞ və İsrail arasında koordinasiyalı şəkildə həyata keçirilməsi çəkindirmə baxımından ciddi inkişafı əks etdirir: “Təl-Əviv Vaşinqtonun dəstəyi ilə Yəməndən “arxa bağça”sı kimi istifadə edən İranın bu imkanlarını əlindən almağa çalışır. Hücumlarda ən mühüm mesaj Qərbin bölgədə İran ekspansiyasına qarşı səbrinin tükənməsi ilə bağlıdır”.

Hərbi ekspert Mənsur Moadi hesab edir ki, Sənaya son hücumlar regional döyüş qaydalarının dəyişməsi baxımından mühüm dönüş nöqtəsidir:

“Son əməliyyatlar yüksək səviyyədə kəşfiyyat əməkdaşlığının açıq əlamətlərini daşıyır və husilərə münasibətdə yanaşma dəyişikliyini ortaya qoyur. Bununla husilər artıq yerli üsyançı hərəkat kimi yox, Vaşinqton və Təl-Əvivin maraqlarını təhdid edən daha geniş İran şəbəkəsinin bir hissəsi kimi qəbul olunur. İsrail döyüşü İranın qeyri-ənənəvi təsir zonalarına daşıyır, Birləşmiş Ştatlar strateji müdafiədən hücuma keçir”.

Xatırladaq ki, dünən husilər İsrailin Sənaya silsilə hücumları zamanı beynəlxalq hava limanı və bütün mülki təyyarələrinin, eləcə də elektrik stansiyası və digər strateji obyektlərin məhv edildiyini açıqlamışdı.