1999-cu ildə Ermənistan Mehrinin Dağlıq Qarabağın müqabilində Azərbaycana verilməsini müzakirə edib.

Publika.az xəbər verir ki, bunu Ermənistanın baş naziri Nikol Paşinyan 44 günlük müharibənin nəticələrini araşdıran komissiyanın iclasında deyib.

"ATƏT-in İstanbul Sammiti (1999-cu il - red.) zamanı daha bir sənəd dövriyyədə idi. Bu, ərazilərin mübadiləsi ilə bağlı sənəd idi", - Paşinyan bildirib

Paşinyan müzakirə olunan sənədin bir neçə bəndi haqda məlumat verərək bildirib ki, 1988-ci il sərhədləri daxilində DQMV, Şuşa və Laçın rayonları Ermənistana, Mehri rayonunun isə Azərbaycana verilməsi müzakirə olunub.

İkinci mərhələ Füzuli, Zəngilan, Ağdam, Cəbrayıl, Qubadlı, Kəlbəcər və Ağdərənin Azərbaycana qaytarılmasını nəzərdə tuturdu.

Bundan əlavə, sovet dövründə mövcud olan anklavlar onları əhatə edən ölkələrə verilməli idi. Ermənistan 60 gün ərzində Mehridən qoşunlarını çıxarmaq öhdəliyi götürmüşdü. Bu ərazidə münaqişə zamanı zərər çəkmiş Azərbaycan vətəndaşları yaşamalı idi.

"Bu sənəd əslində Qarabağ münaqişəsinin həlli ilə bağlı fundamental erməni ideyalarının məhvini təsbit edir. O, qəbul olunmayıb. Belə bir fikir var və mən də bunu bölüşürəm ki, onun imzalanmasına Karen Dəmirçiyan və Vazgen Sarkisyan mane olublar”, - Paşinyan deyib.

Onun sözlərinə görə, proses 1999-cu ilin avqust-noyabr aylarında baş verib.