Sizə söz verirəm ki, İsveç tezliklə NATO-ya üzv olacaq.

Publika.az "Yevropeyskaya Pravda"ya istinadən xəbər verir ki, bu sözləri ABŞ prezidenti Co Bayden deyib

Amerika prezidenti çıxışında NATO-nun gücləndiyini və birləşdiyini vurğulayıb. O əlavə edib ki, Alyans Finlandiyanın və tezliklə İsveçin daxil olması ilə daha da güclənəcək.

Bir gün əvvəl NATO-nun baş katibi Yens Stoltenberq demişdi ki, bu həftə Türkiyə prezidenti Rəcəb Tayyib Ərdoğanla danışıb və İsveçin girişi ilə bağlı irəliləyiş əldə etməyin vacibliyini vurğulayıb. Məlum olduğu kimi, İsveçin NATO-ya daxil olması ilə bağlı protokolu yalnız iki ölkə - Macarıstan və Türkiyə ratifikasiya etməyib.

Ekspertlər hesab edirlər ki, Türkiyədə seçkilərin keçirilməsi İsveçin girişini tamamlamaq üçün yeni “fürsət pəncərəsi” açır, çünki məsələ artıq Ərdoğanın seçki kartı deyil. Demokratiya və qanunun aliliyi ilə bağlı problemləri tənqid etdiyinə görə Stokholmdan “hörmətsizlikdən” şikayətlənən Macarıstan, çətin ki, İsveçin girişini əngəlləyən sonuncu ölkə olsun.

Mehti Kamiloğlu