Mayın 4-də Kiyev vilayətində "Bayraktar-TB2" pilotsuz uçan aparatında nasazlıq yaranıb. Hərbçilər onu paytaxtın üstündəki səmada vurmağa məcbur olublar.

Bu barədə Publika.az Ukrayna Silahlı Qüvvələrinin Hərbi Hava Qüvvələri Komandanlığına istinadla məlumat yayıb.

“Mayın 4-də saat 20:00 radələrində Kiyev vilayətində planlı uçuş zamanı "Bayraktar-TB2" PUA idarəetməni itirib”, - məlumatda deyilir.

PUA-ların paytaxt səmasında nəzarətsiz olması arzuolunmaz nəticələrə səbəb ola biləcəyindən mobil yanğın qruplarının hesablamalarından istifadə edilməsi qərara alınıb.

"Hədəf məhv edilib! Təəssüflər olsun ki, bu, texnikadır və belə hallar olur. Yəqin ki, texniki nasazlıqdır, səbəbləri müəyyənləşdirilir", - Hərbi Hava Qüvvələri əlavə edib.

Döyüş əməliyyatları və PUA-nın qalıqlarının düşməsi nəticəsində ölən və yaralananların olmadığı qeyd edilir.

Xatırladaq ki, ukraynalı müdafiəçilər mayın 4-də axşam saatlarında son hava xəbərdarlığı zamanı Kiyev səmasında pilotsuz uçan aparatı vurublar.