Ukraynada Türkiyənin “Bayraktar” pilotsuz uçuş aparatlarının (PUA) istehsalı və texniki xidməti üçün zavodun tikilməsinə hazırlıq gedir. Bunun üçün Türkiyənin “Baykar Makina” şirkəti Ukraynada torpaq sahəsi alıb.

Sfera.az TASS-a istinadən xəbər verir ki, bununla bağlı məlumatı Ukraynanın Türkiyədəki səfiri Vasil Bodnar bildirib.

Onun sözlərinə görə, zavodun inşaasının 2022-ci ilin sonunadək tamamlanması planlaşdırılır. Bodnar qeyd edib ki, istehsal olunacaq dronlarda Ukrayna məhsullarından istifadə olunacaq. Səfir mühərrik, təkər və başqa bir çox hissənin Ukrayna məhsulları hesabına təmin ediləcəyini söyləyib.

Xatırladaq ki, iyulun əvvəlində Ukrayna hökuməti Türkiyə ilə yüksək texnologiyalar, aviasiya və kosmik sahələr üzrə əməkdaşlığa dair sazişin ratifikasiyası haqqında qanun layihəsini təsdiqləyib. Bu müqavilə Kiyevə öz ərazisində “Bayraktar” istehsalı üçün zavod tikməyə imkan verəcək.

Kiyev ilk dəfə türk pilotsuz təyyarələrini 2021-ci ilin aprelində alıb. 2022-ci il fevralın əvvəlində “Baykar Makina”ya Ukraynada PUA istehsalı zavodunun tikintisinə icazə verilib.