Ukraynanın Rusiyaya qarşı müharibədə qələbəsi Moldovaya Dnestryanı bölgədə qeyri-qanuni yerləşdirilmiş rus qoşunlarının çıxarılmasına nail olmağa imkan verəcək.

Publika.az xəbər verir ki, bunu Moldovanın xarici işlər və Avropaya inteqrasiya naziri Niku Popesku "Vocea Basarabiei"yə müsahibəsində deyib .

Nazir vurğulayıb ki, Moldova hakimiyyəti bu müharibədə Rusiya Federasiyasının məğlub olmasını istəyir və gözləyir.

"Bu münaqişənin həllində əhəmiyyət kəsb edən çoxlu elementlər, aktorlar, ölkələr, institutlar var. İndiki mərhələdə biz hamımız gözləyirik və istəyirik ki, Ukrayna bu müharibədə qalib gəlsin, öz ərazisini azad etsin ki, biz sülh yolu ilə işləməyə davam edək. Ölkənin reinteqrasiyası və ərazimizdə qeyri-qanuni yerləşdirilmiş rus qoşunlarının dinc yolla çıxarılması üzərində işləmək hamımızın arzusudur”, - deyə nazir bildirib.

Popesku, eyni zamanda vurğulayıb ki, müharibə Moldovanın bütün sahələrdə fəaliyyətinin parametrlərini dəyişib.

“Bu müharibə hamı üçün, bütün Avropa dövlətləri, dünyanın onlarla dövləti üçün konteksti dəyişdi, Yaxın Şərq və Afrikanın onlarla dövlətinin ərzaq təhlükəsizliyi üçün konteksti dəyişdi, açıq-aydın görünür ki, bu müharibə Moldova Respublikasının tamamilə bütün sahələrdə, o cümlədən Dnestryanı nizamlanmasında fəaliyyət göstərməsinin parametrlərini dəyişdi. Lakin dediyim kimi, biz hamımız Ukraynanın qələbəsini gözləyirik ki, bu da bizə bu yeni kontekstdə Dnestryanı münaqişənin sülh yolu ilə nizamlanması üzrə işimizi davam etdirməyə imkan verəcək”, - deyə Popesku vurğulayıb.