Ukrayna cəbhəsində vəziyyət yenidən dəyişir. Aylardır məğlub olan ruslar Soledarın işğalı ilə yenidən “dirçəlmiş” kimi görünür, xüsusilə yeni qüvvələrin cəlb edilməsi qərarları döyüşün gedişatına təsir edə bilər, hərçənd, ABŞ və Avropa da Kiyevə silah yardımını artırmaqdadır. Artıq beynəlxalq müstəvidə bir fikir hər kəs tərəfindən qəbul edilir: müharibə tezliklə bitməyəcək və bu özü ilə o sualı da önə çıxarır ki, tərəflərdən hansı nə vaxta qədər dözə biləcək, ruslar Putini devirəcəklərmi, yoxsa Qərbin Ukraynaya dəstəyi tükənəcək?

Publika.az xəbər verir ki, “The Wall Street Journal” nəşri Moskvada Qərbin tükənəcəyi düşüncəsi getdikdə daha çox legitimlik qazanır.

“Hələlik Rusiyanın gözləntiləri özünü doğrultmadı. Avropa Rusiya enerjisindən asılılığına minimal ağrı və heç bir siyasi təlatüm olmadan son qoyur. 2022-ci ildə iqtisadi artım qeydə alınıb, Kiyevin silah tədarükü ilə bağlı konsensus güclənib. Lakin Ukrayna müharibəsi bir neçə il davam edərsə, necə olacaq? Nə ABŞ-da, nə də Avropada bununla bağlı hazırlıqlar var. Potensial enerji şoklarının ağrılı təsirləri hələ qabaqdadır”, - deyə nəşr yazır.

Nəşr qeyd edir ki, ABŞ Konqresinin tərkibinin yenilənməsi, eləcə də Nümayəndələr Palatasında üstünlüyün respublikaçılara keçməsi Kiyevə silah və maddi yardımında problemlər yarada bilər: “Ukraynanın bir vaxtlar güclü olan müdafiə sənayesi 11 aylıq müharibə dövründə Rusiyanın hava hücumları nəticəsində məhv edilib və ölkənin sağ qalması indi demək olar ki, tamamilə Qərbin təchizatından asılıdır”.

ABŞ-da Dəniz Təhlili Mərkəzinin Rusiya üzrə tədqiqat direktoru Maykl Kofman hesab edir ki, münaqişə uzanacağı təqdirdə Qərbin dəstəyi ilə Ukraynanın qalib gəlmək şansı daha yüksəkdir.

“Lakin bu nəticəni əvvəldən müəyyən etmək çətindir. Qalib gəlmək üçün böyük iradə və qətiyyət lazımdır, müharibələr adətən bundan asılı olur”, - amerikalı analitik bildirib.

Nəşr yazır ki, uzunmüddətli perspektivdə canlı qüvvə resursu Moskvanın xeyrinə işləyən amildir: “Silah və sursatı hesablamaq isə bir qədər çətindir. Analitiklərin fikrincə, Ukrayna Qərbin verdiyi 155 mm-lik artilleriya mərmilərini ABŞ və müttəfiqlərinin hesablamalarından iki dəfə tez istifadə edir. Bu sürətlə Kiyev bu yay və ya payızda ABŞ və Avropanın ehtiyatlarını kritik həddə çatdıra bilər. Rusiya isə döyüşlərin tempinə uyğun olaraq sursat istehsalını artıra biləcək. Birləşmiş Ştatlar və müttəfiqləri də yeni sursat istehsalına sərmayə qoyur, lakin gələn ilə qədər böyük fərq yarada bilməsi ehtimalı azdır. Bu, 2023-cü ilin ikinci yarısında Ukrayna və Rusiyanın atəş gücü arasında təhlükəli boşluq yaradacaq”.

Qlobal Məsələlər üzrə Çikaqo Şurasına sədrlik edən İvo Daalder hesab edir ki, Putin xalqını uzunmüddətli qarşıdurmaya hazırlaşır və o, Ukraynaya nəzarət etmək üçün imperiya ambisiyasından heç vaxt vaz keçməyəcək.

Beləliklə, Rusiya-Ukrayna müharibəsinin uzunmüddətli olacağını Qərb analitikləri də qəbul edir. Qələbənin kimin tərəfində olacağını isə proqnozlaşdırmaq çətindir, Maykl Kofmanın dediyi kimi, iradə və cəsarət həlledici rol oynaya bilər.