Bu gün səhər Brüsseldə Serbiya Prezidenti Aleksandar Vuçiç ilə Kosovonun baş naziri Albin Kurti arasında keçirilən danışıqlar nəticəsiz başa çatıb.

Publika.az xəbər verir ki, bu barədə Serbiyanın “Blitz” qəzeti mənbəsinə istinadən məlumat yayıb.

Daha əvvəl bildirilmişdi ki, danışıqların əsas mövzusu Kosovo hakimiyyətinin Serbiya hakimiyyət orqanları tərəfindən verilmiş avtomobil nömrələrinə görə cərimələrin yığılması ilə bağlı qərarı olacaq.

Əvvəlcə Aİ nümayəndələri ilə Kosovonun baş naziri Albin Kurti və Serbiya Prezidenti Aleksandar Vuçiç arasında ayrı-ayrılıqda danışıqlar aparılıb. Kurti ilə görüş yarım saatdan bir qədər çox, Vuçiçlə isə təxminən bir saat davam edib.

Bundan sonra onlar Aİ diplomatiyasının rəhbəri Jozep Borrell, Belqrad və Priştina arasında dialoq üzrə elçi Miroslav Layçak ilə birgə görüşə başlayıblar.

“Bu səhər Brüsseldə Avropa İttifaqının çağırdığı fövqəladə iclasda Belqrada Serbiya üçün aşağılayıcı bir həll təklif olundu”, - deyə qəzet qeyd edir.

Belqrad Brüssel razılaşmasını pozan təklifi qəbul etməkdən imtina edib.

Xatırladaq ki, Kosovo hakimiyyət orqanları yerli serblərdən Serbiya hakimiyyəti tərəfindən verilmiş “KM” hərfləri olan dövlət nömrə nişanlı bütün avtomobillərin Kosovo simvolları və “RKS” yazısı olan nömrələrlə yenidən qeydiyyata alınmasını tələb edir və noyabrın 21-dən etibarən dövlət nömrə nişanlarına keçməyi planlaşdırır.