Türkiyə Prezidenti Rəcəb Tayyib Ərdoğan hələ də Ukrayna lideri Volodimir Zelenski ilə rusiyalı həmkarı Vladimir Putini görüşdürmək istəyir. Bu barədə Türkiyə Prezidentinin sözçüsü İbrahim Kalın deyib.

Kalın qeyd edib ki, Putin Rusiya Ukraynanın dörd vilayətini ilhaq edəndən sonra danışıqlar istəyir: “Bütün çətinliklərə rəğmən, diplomatiya qapısı açıq saxlanılmalıdır. Türkiyə Prezidenti bunu bacarır”.

Ərdoğanın Rusiya-Ukrayna müharibəsi ilə bağlı mövqeyini Sfera.az-a şərh edən politoloq Turab Rzayevin sözlərinə görə, Türkiyə müharibənin ilk zamanlarından bəri açıq şəkildə bildirirdi ki, bölgədə müharibə istəmir.

Politoloq qeyd edib ki, hələ Ukrayna-Rusiya müharibəsi başlamamışdan öncə Ərdoğan “Qara dənizi barıt çəlləyinə çeviriblər” deyərək, öz etirazını bildirmişdi:

“Türkiyə iki ölkə arasında sülhün, ən azından tez bir zamanda atəşkəsin əldə olunması üçün çalışır. Ərdoğan hər zaman Putin-Zelenski görüşünün baş tutması üçün cəhdlər göstərib. İlk dəfə İstanbul sammitində Rusiya ilə Ukrayna arasında ilkin razılıq əldə edilmişdi və bundan sonra Kiyevlə Xarkov ətrafındakı rus ordusu geri çəkilmişdi. Daha sonra Böyük Brityanın birbaşa müdaxiləsi ilə Boris Consunun Kiyevə getməsi nəticəsində müharibə dayandı, tərəflər arasında atəşkəs danışıqları aparılıdı. Böyük Britaniya və ABŞ-ın dəstəyini alan Zelenski açıq şəkildə müharibəni xeyli davam etdirəcəyini və Rusiya üzərində uğur qazandıqdan sonra sülh üçün danışıqlar masasına oturacağını söyləmişdi. Taxıl böhranı olduğu üçün Türkiyənin vasitəçiliyi ilə Ukraynada blokadada qalan taxıllar Odessa hava limanından ixrac edilməyə başladı. Türkiyə yenə də Ukrayna-Rusiya arasında sülhün olması üçün bütün dünyaya səslənir. Ərdoğan sonuncu dəfə 5 ölkə - Amerika, Böyük Britaniya, Almaniya, Fransa və Rusiya rəhbərlərini bir araya çağırıb onlar arasında görüş təşkil etmişdi və sülhə nail olmaq üçün bu ölkələrin birgə fəaliyyətinə çalışmışdı”.

Ekspertin sözlərinə görə, Türkiyənin mövqeyi açıqdır və Ukrayna-Rusiya müharibəsinin bitməsini, heç olmasa müvəqqəti atəşkəs əldə edilməsinə çalışır:

“Burada Rusiyanın da mövqeyi Türkiyə ilə üst-üstə düşür, Moskva da atəşkəsə razıdır. Ancaq Rusiya indiki şərtlərlə atəşkəs istəyir, Ukrayna isə atəşkəs istəsə də, ən azından cəbhədə müəyyən irəliləyiş əldə edib bir neçə vilayəti azad etdikdən sonra atəşkəsə razılıq verməyi planlayır. İstənilən halda Türkiyənin addımı bölgədə sülhə aparacaq yeganə addımdır”.