Türkiyə Böyük Millət Məclisinin (TBMM) sədri Mustafa Şentop finlandiyalı və isveçli həmkarları ilə görüşüb.

Publika.az xəbər verir ki, Mustafa Şentop Finlandiya parlamentinin sədri Matti Vanhanen və İsveç parlamentinin sədri Andreas Norlen ilə onlayn formatda üçtərəfli görüş keçirib.

Qardaş ölkə parlamentinin sədri İsveç və Finlandiyanın strateji məqsəd kimi irəli sürdüyü NATO üzvlüyünü Türkiyənin prinsipial olaraq dəstəklədiyini bildirib.

Görüşdə iyun ayında NATO-nun Madrid Zirvə toplantısında imzalanan Üçlü Memorandumu xatırladan Şentop Türkiyenin PKK, FETÖ və bütün digər terror təşkilatları ilə bağlı hər iki ölkədən atılacaq addımı gözlədiyini, lakin hələ də heç bir addım atılmadığını dilə gətirib.

Türkiyənin iki ölkənin öhdəliklərini yaxından izlədiyini qeyd edən Mustafa Şentop görüş zamanı deyib ki, Üçtərəfli Memorandum bu prosesdə onlara bələdçi olmalıdır:

"İsveç və Finlandiyanın NATO üzvlüyü təsdiq edilmək üçün TBMM-yə göndərildikdə, TBMM-də bu prosesdə baş verəcək müzakirələrdə adıçəkilən memorandum əsas kimi götürüləcək. Şübhəsiz ki, Memorandumun nə dərəcədə həyata keçirildiyi qiymətləndiriləcək".