Ermənistanın “harda aş, orda baş” olması artıq adi hala çevrilib. Ancaq hərdən bu ölkənin baş bilənləri başlarını elə “qazana” soxurlar ki, orda nə bişib-bişməməsindən asılı olmayaraq özlərinə ən yağlı tikə axtarırlar.
Bildiyimiz kimi BMT Baş Assambleyası Rusiyanın təklif etdiyi nasizmin qəhrəmanlaşdırılmasına qarşı mübarizə qətnaməsini təsdiqlədi. Təşəbbüsü dəstəkləyən 130 ölkənin sırasında məhz Ermənistanın da yer alması, az qala yeri yerindən oynadır.
Baxın, sənəd “Nasizmin qəhrəmanlaşdırılmasına, neonasizmə və digər praktiki növlərinə qarşı mübarizə” adını alıb. Qətnamə “İkinci dünya müharibəsinin nəticələrinə yenidən baxılmasının və insanlığa qarşı cinayətlərin və hərbi cinayətlərin rədd edilməsinin” qarşısını almaq üçün tədbirlər görməyə çağırır. Burada müəlliflər irqçiliyi, ayrıseçkiliyi, nifrət və zorakılığı, etnik mənşəyi, milləti, dini və ya inancları təbliğ edən təhsil materiallarının istifadəsini pisləyir və ayrıseçkiliyin bütün formalarının mümkün vasitələrlə ləğv edilməsinə çağırış edirlər.
Əlbəttə belə bir Qətnamənin qəbul edilməsi bəyəniləndir və bunu hətta gecikmiş də hesab etmək olar. Bu arada, Azərbaycan Prezidentinin hələ 2019-cu ildə Aşqabadda keçirilən MDB Dövlət Başçıları Şurasının iclasında Ermənistan hökumətini Qaregin Njdenin timsalında nasizmi qəhrəmanlaşdırdığına görə necə sərt və tutarlı faktlarla ifşa etdiyini yəqin ki, hər kəs yaxşı xatırlayır. Ancaq Paşinyan onda öz “qəhrəmanını” müdafiə etməyə cəhd edərək, Hitlerin xüsusi xidmət orqanlarına satılmış erməni agentini gah “repressiya qurbanı”, gah da “erməni xalqının qəhrəmanı” kimi gözə dürtməyə çalışdı.
İndi yəqin ki, Ermənistan baş bilənlərinin bu sənədə hansı mənəvi haqla, hüquqla və ya məqsədlə imza atdığı sualı çoxlarını düşündürür. Ancaq heç kim unutmamalıdır ki, Ermənistanda nasizmin, eləcə də terrorçuların qəhrəmanlaşdırılması həmişə dövlət siyasətinin tərkib hissəsi olub və bu, elə indi də davam etməkdədir. Şübhəsiz ki, Ermənistan bu Qətnaməyə səs verməklə, İrəvanda ucaldılmış öz faşist Qareqin Njdesinin abidəsinə bəraət qazandırır və o bu qəbildən olan digər “daşları” xalq qəhrəmanı donunda dünyaya qəbul etdirmək istəyir.
Ancaq özünü sivil göstərərək belə bir sənədə imza atan, hazırda Türkiyə və Azərbaycanla münasibətləri qismən də olsa düzəltməyə razılaşmış İrəvan, “daş atıb başını tutmadan” ilk növbədə XX əsrin əvvəllərində yüz minlərlə türk-müsəlmanının qatili olmuş millətçi, faşist düşüncəli qaniçən Dro, Andranik Ozanyan, Qaregin Njde, Soqomon Teyleryan kimi “qəhrəmanlarının” xatirəsinə ucaltdıqları “daşları” başından etməlidir.
Yeri gəlmişkən, 2019-cu ilin noyabrında Krasnodar vilayətində Armavir Şəhər Dumasının deputatı Aleksey Vinoqradov Qareqin Njdenin xatirə lövhəsini qara boya ilə boyamışdı. Armavir ictimaiyyəti hakimiyyətdən abidənin sökülməsini tələb edirdi və nəhayət, nəticə əldə edildi. Ermənilər nə qədər hay-həşir salsalar da heç nəyi dəyişə bilmədilər.
Baxın, irqçiliyi, ayrıseçkiliyi, zorakılığı, etnik mənşəyi, milləti və dini pisləyən sənədə imza atan İrəvan indi hansı üzlə Türkiyə və Azərbaycanla münasibət qurmağa çalışır ki, o Şirak bölgəsində 1921-ci ildə Berlində Mehmet Tələt Paşanı öldürmüş Soqomon Teyleryanın şərəfinə Türk xalqını son dərəcədə təhqir edən abidə ucaldıb? Bu arada hələ 4 il öncə Fransanın Marsel şəhərində terrorçu, nasist Soqomon Teyleryanın adına yeni meydan açılmışdı. Bu meydanı elə Marsel şəhəri meri özü “sulamışdı”. Onun razılığı və Fransadakı erməni lobbisinin maliyyəsi ilə erməni “soyqırımının” 102-ci illiyi Soqomon Teyleryanın adına açılan meydanda qeyd edilmişdi.
Məlum sənədlə bağlı Rusiya Xarici İşlər Nazirliyinin insan hüquqları, demokratiya və hüquq aliliyi üzrə müvəkkili Qriqori Lukyantsevin fikrincə, qətnamənin qəbul edilməsi irqçiliyin və irqi ayrıseçkiliyin aradan qaldırılması işinə real töhfə verəcəkdir. Çox gözəl, o zaman buyursun Qarabağdakı rusiyalı “məramı sülhlər” Azərbaycanın Xocavənd rayonunda erməni separatçılarının yerləşdirdiyi Njdenin heykəlini götürsün və ya götüzdürsün.
Necə olur, Cövhər Dudayevin şərəfinə İstanbuldan 120 km aralıda olan Kocaeli vilayətinin Körfez şəhərində park açılması, Rusiya Xarici İşlər Nazirliyinin sözçüsü Mariya Zaxarovanı nə tez narahat etdi? “Ekstremistlərə, terrorçulara və yaraqlılara hər cür abidənin ucaldılması ilə bağlı bizim prinsipial mövqeyimizi bilirsiniz. Bu mövqe dəyişməzdir, prinsipialdır və istənilən ölkəyə aiddir”, deyən xanım Zaxarova indi buyursun, Ermənistanda, həmçinin Azərbaycan ərazisində bu qəbildən olanların “şərəfinə” ucaldılmış daşların yığışdırılması üçün açıq və prinsipial mövqeyini ortaya qoysun. Bu, ilk növbədə Azərbaycan tərəfindən alqışlanacaq və inanırıq ki, Mariya xanım, nəinki öz ölkəsində hətta bütün dünyada “Sadə Mariya”dan da çox sevilərək məşhur olacaq.
Əlbəttə, Ermənistan adəti üzrə istənilən sənədə imza ata bilir, amma bu sənədlərlə bağlı iş öz üzərinə düşəndə “kardaşyanlıq” etməkdən zərrəcə utanmır. Ancaq rəsmi İrəvan bir şeyi qanmalıdır ki, Azərbaycanla münasibətdə, xüsusən də Qarabağ məsələsində onun “bir əldə iki qarpız” tutması mümkün olmayacaq. O bu qətnamədəki öz imzasına mütləq əməl etməlidir. Yox əgər Ermənistan BMT-nin əvvəlki məlum 4 qətnaməsi kimi bu qətnaməsinə də əməl etməsə, görünür onda iş yenə Azərbaycan Ordusunun üzərinə düşəcək.
Mübariz Azərbaycanlı, müstəqil jurnalist