Karantin rejiminin yumşaldıldığı bir vaxtda koronavirusun Hindistan ştammı ("Delta") getdikcə təhlükəli xarakter almağa başlayıb.

Artıq dünyanın bir sıra ölkələrində "Delta"ya yoluxma və ölüm halları artıb.
Hazırkı vəziyyətdə Hindistan ştammı ölkəmiz üçün nə qədər təhlükəlidir? Virusun yayılması yenidən qapanmalara gətirib çıxara bilərmi?

Məsələ ilə bağlı Redaktor.az-a danışan həkim-infeksionost Vüqar Cavadzadə deyib ki, "Delta plus" COVID-19-un Hindistan ştammından mutasiya olunmuş yeni bir tipdir. Virusun xüsusiyyətləri ondan ibarətdir ki, sürətlə yayılır, uşaqlar arasında yoluxma halı çox olur. Artıq qonşu ölkələrdə varsa, əlbəttə ki, bu bizim üçün də təhlükə deməkdir.

"Rusiyada son həftədəki vəziyyətə baxsaq görərik ki, günə təxmini 2000-2500 adam ölür. Virus çox sürətlə yayılır və ölkə artıq müəyyən tədbirlər görməyə başlayıb. İsraildə isə qapalı məkanlarda maska taxmamaq məcburiyyəti götürülüb. Türkiyədə də qismən qapanmalara başlanılıb. Ölkəmizdə də yoluxma kəskin sürətdə artarsa, o zaman müəyyən məhtudiyyətlərə getmək olar. Burada söhbət Britaniya yaxud Hindistan ştampından getmir, ümumilikdə koronavirusla bağlı vəziyyət pisləşərsə qapanmalar ola bilər".

Azərbaycanda tətbiq edilən vaksinin yeni ştamma təsiri məsələsinə gəldikdə, həkim bildirdi ki, bu virus COVID-19-dan törədiyindən, onun tiplərinə də effektivdir:

"Koronavirusun tərkibi 30000 amin turşusundan təşkil olunub. Quruluşun hər hansı birinin mutasiyaya uğraması yeni bir tip deməkdir. "Delta" variantının da quruluşu tam olaraq COVID-19-un quruluşundan fərqlənmir. Bu baxımdan koronavirusa qarşı istifadə edilən peyvənd onun tiplərinə də effektivdir. Nə dərəcədə təsirli olacağı isə hələlik məlum deyil".