Pandemiyanın yayılma sürəti artır və hələ ki, bitməyib.

Bunu ÜST-ün Azərbaycandakı nümayəndəliyinin rəhbəri Hande Harmancı Operativ Qərargahın bugünkü brifinqində deyib.

ÜST rəsmisi bildirib ki, ilk 100 mində yoluxma sürəti 2 ay vaxt alsa da, son günlərdə bu artıb: "Son iki gündə Azərbaycanda virusa yoluxmada 50 faiz artım müşahidə olunub. İndi ən vacib tədbir sosial məsafənin qorunmasıdır. Hər kəs, xüsusilə, ictimai yerlərdə sosial məsafəni qorumalıdır. Bildiklərinizi özünüzdə saxlamayın. Maarifləndirmə aparın. Ancaq bu şəkildə özümüzü qoruya bilərik. Avropada vəziyyət yaxşılaşsa da, qlobal səviyyədə bu, ürəkaçan deyil. Dünya üzrə virusa yoluxanların 21 faizi tibb işçiləridir".

O bildirib ki, ÜST tərəfindən 10 peyvənd üzərində sınaq aparılır: "Bir peyvənd yaxın zamanlarda tətbiq oluna bilər".

Hande Harmancı əlavə edib ki, COVID-19 ilə mübarizədə "Sağlamlıq həmrəyliyi" layihəsi başlayacaq: "Bu layihə 2 il davam edəcək. Bu müddətdə ön cəbhədə çalışan tibb işçilərinin tibbi ləvazimatlarla təmin olunmasına dəstək olacaq, onlara təlimlər keçəcəyik".