Oturaq sinirin radikuliti və ya işias
Oturaq sinirin gedişatı boyu sağrıdan aşağıya doğru uzanan ağrı tez-tez rast gəlinir və onurğa sinirinin sıxılması səbəbindən yaranan radikulit adlanır. Bu halların 85%-i onurğada fəqərələrarası disklərin zədələnməsi, o cümlədən, yırtığı, və ya digər xəstəlikləri ilə bağlıdır. Ümumiyyətlə, oturaq sinirin radikuliti/işias həkimlərə hələ qədimdən tanışdır.
İşiasın bir sıra səbəbləri olsa da, Mikster və Barr tərəfindən aparılmış müşahidələr nəticəsində əsas səbəb kimi fəqərələrarası diskin ətrafındakı annulus fibrosus halqasının cırılması, diskin qabarması və ya yırtılması nəticəsində oma sinirin (lumbar) kökünün sıxılması olduğu 1934-cü ildə təsbit edilmişdir. Neyroradioloji görüntüləmələrin təhlili də onu deməyə əsas verir ki, işiasın 85%-nin səbəbi məhz fəqərələrarası disk xəstəliyidir. Dördüncü və beşinci oma sinirlərinin kökləri (lat. nervus Lumbales, IV et V) və ilk iki sakral sinirin kökləri lumbosakral kələfdə birləşərək peroneal və tibial sinirlər formalaşdırır. Bu sinirlər isə çanağı vahid oturaq sinir tərkibində tərk edir.
Oturaq sinirinin gedişatında istənilən yerdə baş vermiş pozuntu işiasa və ya oturaq sinirinin radikulitinə səbəb ola bilər. Əksər hallarda pozuntular onurğa sütunun L4-L5 və L5-S1 səviyyəsində baş verən fəqərələrarası diskin cırılması və həmin səviyyədə osteoartritin inkişafı nəticəsində baş verən dəyişikliklərlə bağlı olur. Daha az hallarda L3-L4 səviyyəsində baş verən pozuntular da işiasa səbəb ola bilər.