Son dəqiqə
Tromboz nədir?
Tromboz; Qan damarının mənfəzində qanın həyati olaraq patoloji laxtalanması prosesinə deyilir. Trombun əmələ gəlməsinə təsir edən səbəblər ümumi və yerli qruplara bölünməklə çoxsaylıdırlar. Ümumi amillərə qanın koaqulyasiya və antikoaqulyasiya sistemləri arasında tarazlığın pozulması və qanın reoloji xüsusiyyətlərinin dəyişilməsi; yerli amillərə isə damar divarındakı dəyişikliklər və qanın axınının zəifləməsi aiddir. Trombozun səbəbləri:
- Qanın tərkibində baş verən dəyişikliklər.
- Qan axınının zəifləməsi.
- Endotelin strukturunun zədələnməsi və funksiyasının pozulması.
Əgər tromb damarın bir tərəfində, divara yapışmış halda olarsa, buna divarönü tromb; damar mənfəzini tamamilə tutmuş olarsa, buna obturasion tromb deyilir.
Əksər hallarda ölüm baş verdikdən sonra meyitdə damar daxilində qan laxtaları əmələ gəlir. Bu qan laxtalarını həyati trombdan differensasiya etmək bəzən çox vacib olur və belə hallarda aşağıdakı fərqli cəhətlər – makroskopik diferensial əlamətlər alınmalıdır.
Həyati trombun konsistensiyası nisbətən bərk olur, ölümdən sonrakı (postmortal) qan laxtası isə kövrək olur və əllə sıxdıqda asanlıqla dağılır;
Həyati trombların səthi tutqun rəngdə, postmortal qan laxtaları isə parlaq və hamar olur;
Həyati tromb damar divarına möhkəm bitişmiş olur, postmortal qan laxtası isə damara bitişmir və ondan asanlıqla sürüşüb ayrılır;
Həyati olaraq əmələ gəlmiş trombların, xüsusilə də arterial damarlarda əmələ gəlmiş trombların səthi, ürək ritmləri ilə əlaqədar dalğavari olur;
Ölümdən sonrakı qan laxtaları əsasən venoz damarlarda və sağ ürəkdə olur, arteriyalar isə boş olur. Arteriyalarda əmələ gəlmiş tromblar adətən ağ rəngdə olur. Postmortal qan laxtaları isə qırmızı rəngdə olurlar, ona görə də venalarda əmələ gəlmiş tromblara bənzəyirlər;
Adətən üzvdaxili orta və xırda kalibrli damarlarda postmortal qan laxtaları əmələ gəlmir.
[/b][b]
