Amerika tədqiqatçıları müəyyən ediblər ki, yuxunun keyfiyyəti ailədəki gərginlik səviyyəsi ilə birbaşa bağlıdır və bu təsir xüsusilə qadınlarda daha qabarıq şəkildə özünü göstərir.

Publika.az xəbər verir ki, tədqiqatın nəticələri "Journal of Health and Social Behavior" (JHSB) jurnalında dərc edilib.

Yuxu adətən fərdi bioloji ehtiyac kimi qəbul edilsə də, əksər ailələr üçün bu, həm də birgə fəaliyyətdir: cütlüklər eyni yatağı paylaşırlar və birinin narahat yuxusu digərinin halına təsir göstərir.

Ostindəki Texas Universitetinin tədqiqatçıları yuxu keyfiyyətinin nikahdakı münasibətlərə necə təsir etdiyini araşdırmaq üçün 378 cütlüyün (ümumilikdə 756 nəfər) məlumatlarını təhlil ediblər. İştirakçılar əvvəlcə ətraflı anket doldurub, daha sonra on gün ərzində hər gün yuxularının keyfiyyəti və partnyorları ilə münasibətləri haqqında sualları cavablandırıblar. Onlar həm əvvəlki gecə nə dərəcədə yaxşı yatdıqlarını, həm də son sutka ərzində partnyorları tərəfindən incidilmiş, qıcıqlanmış və ya dəyərsizləşdirilmiş hiss edib-etmədiklərini qiymətləndiriblər.

Təhlil göstərib ki, ümumilikdə yaxşı yuxu növbəti gün daha az münaqişə və gərginliklə bağlıdır. Ən nəzərəçarpacaq təsir qadınlarda müşahidə olunub. Üstəlik, qadınların münasibətləri qavramasına təkcə onların öz yuxu keyfiyyəti deyil, həm də partnyorlarının necə yatması təsir edib. Tədqiqatın aparıcı müəllifi Asya Saydam bildirib ki, qadınlar həm öz yuxularına, həm də partnyorlarının yuxusuna reaksiya verirlər və bu həssaslıq məlumatlarda aydın görünür.

Tədqiqatçıların fikrincə, bu, qadınların münasibətləri qorumaq üçün emosional yükü və ev işlərinin əhəmiyyətli hissəsini daha çox öz üzərlərinə götürmələri ilə bağlı ola bilər. Buna görə də, yuxusuzluq onların emosional vəziyyətinə və ailə münasibətlərini qavramalarına daha güclü təsir göstərir.