Naftalan nefti - dünyada misli olmayan unikal bir tibbi vasitədir. Naftalan – qatı konsistensiyalı, qara - qəhvəyi rəngdə özünəməxsus ətirli bir mayedir. Naftalan neftinin əsas təsiredici maddəsi naften karbohidratlarıdır ki, onun özündə, bir çox fermentlərin hormonların, digər fizioloji aktiv maddələrin tərkibində olan tsiklopentan-perhidrofenantren skeletinin olması ilə bağlıdır və ağrıkəsici, iltihab əleyhinə, damargenişləndirici, antiallergik, trofik funksiyaların və mübadilə proseslərinin intensivliyinin aktivləşdirici, spermatogenez proseslərinin stimuledici, ovulyasiya və ovogenez proseslərinin tezləşdirici təsirinə malikdirlər. Bütün bu təsirlərə əsaslanaraq Naftalan müalicəsi tibbin bir çox sahələrində əvəzsiz müalicə metodu kimi qəbul edilmişdir.
Əzələ-skelet sistemində oynaqların və oynaqətrafı yumşaq toxumaların xəstəlikləri
- Revmatik poliartrit (minimum dərəcədə aktiv olan passiv fazada Sokolbuyno xəstəliyi).
- Minimal aktiv olan revmatoid artrit, poliartrit xəstəlikləri.
- İnfeksion spesifik artrit, poliartrit (bruselyoz, dizenteriya, viruslu).
- Deformasiyaedici spondilyoz, spondiloartroz xəstəlikləri.
- Digər xəstəliklərlə əlaqəli artrit, artroz, podaqra poliartriti, xoşxassəli poliartrit, vibrasion xəstəliklər.
- Oynaqətrafı yumşaq toxumaların və əzələ-skelet sisteminin xəstəlikləri - bursit, tendovaginit, periartrit, miozit, mialgiya, miofassit xəstəlikləri.
- Bexterev xəstəliyi.
Oynaq xəstəliklərinin naftalan terapiyası patogenetik müalicə üsuludur. Bu müalicənin təsirini artırmaq üçün naftalanla paralel kompleks şəklində fiziki və dərman müalicəsi də tətbiq olunur. Naftalan orqanizmin müdafiə proseslərində vacib rol oynayan sinir və retikuloendotel sistemlərinə təsir göstərərək iltihabi proseslərin aradan qaldırılmasına, ağrıların azalmasına, qan dövranının yaxşılaşmasına kömək edir.
Naftalan xondroitinsulfat sintezini stabilləşdirir, yeni qığırdaq hüceyrələrinin artmasına təkan verir, bunun nəticəsində isə oynaq qığırdaqları bərpa olunur. Naftalan müalicəsi, massaj, fizioterapiya, müalicəvi bədən tərbiyəsi kimi komponentləri ehtiva edən kompleks sanator-kurort müalicəsi nəticəsində daha yaxşı müalicə effektli nəticə verir. Məqsədyönlü müalicə aparıldıqda patoloji təzahürlər azalır yaxud aradan qalxır, əzələ spazmaları azalır, palpasiya zamanı ağrılar aradan qalxır, oynaqların funksional tutulmaları aradan tam sağalır. Bütün bunların nəticəsində hərəkətlilik artır və ağrı hissləri azalır. Balneoterapiya, hidroterapiya, manual terapiya və əzələlərin postizometrik relaksasiyası, klassik massaj və fizioterapiyanın paralel tətbiqi ilə aparılan kompleks konservativ müalicə üsulu skolioz zamanı daha effektiv nəticələrin yaranmasına səbəb olur.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından