Valerian bitkisi nə qədər möcüzəvi, sakitləşdirici təsirə malik olsa belə, onun da qəbulunda bəzi qaydalara əməl etmək lazımdır, həkimlə məsləhətləşmək vacibdir.
Valerian/Pişikotu bədəndə toplaşmaq xüsusiyyətinə malikdir. Həm də bəzi qrup xəstələrə əks təsir göstərə bilər. Məsələn, yaşlı insanlar bu bitkini qəbul etdikdə ehtiyatlı olmalıdır. Çünki valerian bitkisinin qanı qatılaşdırmaq xüsusiyyəti də var. Bu isə, öz növbəsində, trombların yaranmasına, infarkta gətirib çıxara bilər. Yüksək arterial təzyiqdən əziyyət çəkən, requlyar olaraq valerian cövhəri qəbul edən xəstələrdə isə həddən artıq oyanıqlıq və yuxusuzluq yarana bilər. Anamnezində enterokolit, qlomerulonefrit, qaraciyər xəstəlikləri olan xəstələrin də valerian ilə müalicə almaları məsləhət deyil. Depressiyalı, erektil funksiyasında, psixiki pozuntular olanlar isə valerian cövhəri qəbul etmək istəsələr və ya bu şikayətlərlə yanaşı, qəbul edirlərsə mütləq həkimlə məsləhətləşməlidirlər. Hamilə qadınlar və allergiyası olanlar da bu bitkidən çox istifadə etməməlidirlər.
Valerian cövhərini kontrolsuz şəkildə istifadə etmək zəhərlənmələrə də gətirib çıxara bilər. Pasiyentlərin valerian ilə zəhərlənmələrində aşağıdakı simptomları olur: baş ağrısı, baş gicəllənmələr, yuxululuq, zəiflik, apatiya, ölüm və tənhalıq qorxusu, arterial təzyiqin enməsi, bədən hərarətinin enməsi, ürəkbulanma, qusma, tənəffüsün çətinləşməsi. Yaşlı insanlarda qeyri-iradi sidik və defekasiya aktı, bəzi hallarda isə komaya belə gətirib çıxara bilər.
Tərkibində pişikotu olan dərman preparatları:
-Valerian tablet 200 mq, № 50.
-Valerian cövhəri N 1 flakon.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından