Hamiləlik zamanı art-terapiyanın qadının sinir sisteminə sakitləşdirici təsir etməsi, ümumiyyətlə isə orqanizmə müsbət təsiri öz təsdiqini tapmışdır.
Daha qədim vaxtlarda belə hamilə qadınlar dünyaya gətirəcəyi körpələri üçün xoş sözlər söyləyər, bayatılar oxuyar, doğulacaq körpəsini əzizləyə-əzizləyə ona öz əlləri ilə geyimlər toxuyar, köynəklər, papaqlar, yaylıqlar və digər geyimlər tikər, onlara gözəl naxışlar vurardılar. Bu cür yaradıcı işlə məşqul olan hamilələrin sinir sistemi çox sakit olardı və gələcək körpəsinin dünyaya gəlməsini səbirsizliklə və sevgi ilə gözləyərdilər. Dünyaya gələcək körpə ilə ana arasında çox möhkəm sevgi bağları yaranardı.
Əfsanəyə görə incəsənətin bütün növlərini Muzalar himayə edir və musiqi/muzıka, muzey termini də onların adı ilə bağlıdır.
Muzalar (Yunan dilindən “düşünmə” olaraq tərcümə olunur) – Olimpin bütün tanrılarının tabe olduğu baş tanrı Zeusun qızlarıdır, anaları isə yaddaş tanrıçası Mnemosinadır ki, o şeir, incəsənət və elmi himayə edir. Hər Muzanın (onların doqquz olması göstərilir və incəsənəti himayə edərlər) öz atri-butu var – bu simvolik bir mövzu və ya predmet onun hansı prinsiplə əlaqəli olduğunu göstərir.
Azərbaycan folklorunda da qədimdən günümüzə qədər gəlib çatmış çox sayda oyunlar, maskalardan, cilddəyişmədən istifadə edilməklə yaranmış oyunlar, xalq nağılları, həm ədəbiyyatı həm də musiqini özündə birləşdirən laylalar, bayatılar, muğamlar var ki, bu incəsənət və folklor nümunələrinin həqiqətən də insan psixikasının, şəxsiyyətinin formalaşmasındakı müsbət təsirləri danılmazdır və alimlərimiz tərəfindən sübut olunmuşdur.

Müəllif: Firəngiz Rüstəmova
"FOLK VƏ YA XALQ TƏBABƏTİ" kitabından