Karotenoid astaxantin karbohidrat mübadiləsini sürətləndirməyə, qanda şəkərin səviyyəsini azaltmağa və ürək-damar sisteminin vəziyyətinə müsbət təsir göstərə bilir.

Publika.az xarici mətbuata istinadən xəbər verir ki, beynəlxalq mütəxəssislər qrupunun bu barədə apardığı araşdırmanın nəticələri “Food.News” portalında yayımlanıb.

Bədəndən sərbəst radikalları çıxaran karotenoidlər dəniz məhsullarında (məsələn, qızılbalıq, alabalıq, karides, cır), tərəvəz və narıncı rəngli meyvələrdə olur. Qidalanma mütəxəssisləri iki ay bu məhsullardan yeyən diabet xəstələrində yağ kütləsinin azalmasını, təzyiqin normallaşmasını, şəkər və xolesterin səviyyəsinin azalmasını müşahidə edib.

Ekspertlər antioksidantların immunitetin xəstəliklərə qarşı müqavimətini artırdığını, daxili və xarici təsirlərdən qorunmasını təmin etdiyini, dərinin cavan qalmasına kömək etdiyini xatırladıb.

Şirniyyatdan imtina isə səhhətin yaxşılaşmasına kömək edir. Mütəxəssislərin fikrincə, rəfinə edilmiş şəkər konsentrasiyanı, cəlbediciliyi və enerjini azaldır.