Mütəxəssislərin sözlərinə görə, bəlğəmli öskürək tənəffüs yollarında toplanan seliyin bədəndən xaric edilməsi üçün orqanizmin təbii reaksiyasıdır. Lakin uzun müddət davam etdikdə narahatlıq yaradır və müalicə tələb edir.

E-saglam.az xəbər verir ki, həkimlər bildirirlər ki, bəzi təbii vasitələr bəlğəmin yumşalmasına və öskürəyin yüngülləşməsinə kömək edə bilər. Onların arasında bal və limon, zəncəfil çayı, soğan suyu və kəklikotu dəmləməsi xüsusi yer tutur.

- Bal və limon: Bal boğazı sakitləşdirir, limon isə C vitamini ilə immuniteti gücləndirir. İlıq suya əlavə edilərək gündə 2-3 dəfə içilməsi tövsiyə olunur.

- Zəncəfil çayı: İltihabəleyhinə xüsusiyyətlərə malik olan zəncəfil bəlğəmin atılmasını asanlaşdırır.

- Soğan suyu: Təbii antibiotik təsirinə malikdir və tənəffüs yollarını təmizləyir.

- Kəklikotu dəmləməsi: Bəlğəmgətirici təsiri sayəsində öskürəyi azaldır və nəfəs yollarını açır.

Mütəxəssislər həmçinin bol maye qəbul etməyi, otağın havasını rütubətli saxlamağı və siqaretdən uzaq durmağı məsləhət görürlər.

Həkimlərin fikrincə, bu təbii üsullar yüngül hallarda effektiv nəticə versə də, öskürək iki həftədən çox davam edərsə və ya qızdırma, nəfəs darlığı kimi simptomlarla müşayiət olunarsa, mütləq həkimə müraciət etmək lazımdır.