Başlıq sizi təəccübləndirə bilər: “Öskürək zamanı qabırğalar necə qırıla bilər?” Lakin mütəxəssislər xəbərdarlıq edir – bu hal, xüsusilə stres altında yaşayan gənclər və qadınlarda getdikcə daha çox müşahidə olunur.

E-saglam.az xəbər verir ki, Torakal Cərrahiyyə mütəxəssisi professor Dr. Güven Sadi Sunam, son zamanlarda gənc pasiyentlər arasında öskürək sonrası yaranan qabırğa sınıqlarının artdığını və bu vəziyyətin ciddi sümük zəifliyinin göstəricisi ola biləcəyini bildirib. Onun sözlərinə görə, qəfil başlayan sinə ağrısı çox vaxt düzgün diaqnoz qoyulmadığı üçün diqqətdən qaçır.

Gənclərdə və qadınlarda daha çox rast gəlinir:

Prof. Dr. Sunam qeyd edib ki, bu problem daha çox astması olan və stresli həyat yaşayan gənc qadınlarda müşahidə olunur:

“Xəstələr qəfil öskürəkdən sonra başlayan sinə ağrısından şikayətlənirlər. Tomoqrafiya apardıqda qabırğa sınıqları aşkarlanır. Bu hallar artıq sadəcə yaşlılara məxsus deyil”.

Günəşi görməyən nəsil: zəif sümüklər

Mütəxəssis, gənclərdə bu sınıqların əsas səbəblərindən birinin D vitamini çatışmazlığı və hərəkətsizlik olduğunu vurğulayıb:

“Gənclər günəş işığı görmür, daha çox qapalı məkanlarda yaşayır və hərəkətsiz qalırlar. Bu da sümüklərin zəifləməsinə gətirib çıxarır. Üstəlik siqaret çəkmək ağciyər xəstəliklərini artırır, öskürək tutmalarına səbəb olur və bu da zəif sümüklərdə sınıqlara yol açır.”

Qidalanma və günəş həyati əhəmiyyət daşıyır:

Qidalanmanın da böyük rol oynadığını deyən Dr. Sunam əlavə edib:

“Kollagenlə zəngin qidalar – məsələn, sümük və ya toyuq bulyonu faydalıdır. Amma təkcə bununla kifayətlənmək olmaz. Balanslı pəhriz, aktiv həyat tərzi və günəşdən kifayət qədər faydalanmaq sümükləri gücləndirir.”

D vitamini: sağlam sümüklərin açarı:

Mütəxəssis, D vitamininin həm sümüklərin möhkəmliyi, həm də ümumi sağlamlıq üçün vacib olduğunu xatırladaraq bildirib:

“Günəşə çıxmaq, təmiz hava almaq və siqaretdən uzaq durmaq sağlam həyatın əsas şərtləridir.”

Gənclərdə artan öskürək mənşəli qabırğa sınıqları, sadə bir simptomun arxasında ciddi sümük zəifliyinin gizləndiyini göstərir. Düzgün qidalanma, hərəkətli həyat və günəş işığından faydalanmaq bu riski azaltmağın ən təsirli yollarıdır.